Da 72. Psalm.
En Gebayt Fa Da Kaynich Un Sei Reich
En Psalm fumm Solomon.
1 Gebb em kaynich eisicht fa dei gericht ausdrawwa, oh Gott,
un dei gerechtichkeit zu em kaynich sei sohn.
2 So es eah dei leit richta dutt mitt gerechtichkeit,
un feah is zu dei oahmi.
3 Loss di berga fridda bringa zu di leit,
un di hivla gerechtichkeit.
4 Eah soll di oahma funn di leit recht yoosa,
selli helfa es noht henn,
un selli nunnah dredda es anri nunnah dredda.
5 Eah soll layva so lang es di sunn sheind
un so lang es es en moon hott,
funn nohch-kummashaft zu nohch-kummashaft.
6 Loss een sei vi reyyah es uf gmayt graws fald,
vi di drobba es es land vessahra.
7 In sei dawwa loss di gerechta bleeya,
un grohsah fridda sei biss da moon nimmi is.
8 Eah zayld roola funn say zu say,
un fumm Euphrates Revvah zu's end funn di eaht.
9 Di leit in di vildahnis zayla sich nunnah bikka fannich eem,
un sei feind zayla da shtawb shlekka.
10 Di kaynicha funn Tharsis un di islands
zayla eem kshenkah bringa,
un aw di kaynicha funn Sheba un Seba
zayla eem kshenkah bringa.
11 Awl di kaynicha zayla sich nunnah bikka zu eem,
un awl di heida zayla een deena.
12 Eah macht selli frei es noht henn vann si zu eem roofa,
un helft di oahma es kenn hilf henn.
13 Eah is bamhatzich zu di shvacha un oahma,
un helft di sayla funn selli es noht henn.
14 Eah macht iahra layva frei funn gvald un funn nunnah gedrikt sei,
un iahra bloot is keshtlich in sei awwa.
15 Loss een lang layva,
un loss gold funn Seba zu eem gevva sei.
Di leit sella bayda fa een,
un een saykna da gans dawk lang.
16 Loss es frucht dikk shtay im land,
loss es sich zrikk un faddi beeya drovva uf di hivla.
Loss es frucht shteik vaxa vi in Lebanon,
un loss di shtett ufkfild sei mitt leit
vi's graws im feld.
17 Loss sei nohma sei fa'immah,
loss sei nohma shtay so lang es di sunn sheind.
Deich een sella awl di heida ksaykend sei,
un si zayla een preisa.
18 Ksaykend is Gott da Hah, da Gott funn Israel;
yusht eah laynich dutt vundahboahri sacha.
19 Glohbt is sei hallichah nohma fa'immah;
loss di gans eaht kfild sei mitt sei hallichkeit.
Amen! Amen!
20 Dess is es end funn di gebaydah fumm Dawfit,
em Jesse sei boo.