Da 44. Psalm.
En Gebayt Fa Hilf
En lanning funn di kinnah fumm Korah. Zumm foah-singah.
1 Miah henn keaht mitt unsah oahra, oh Gott,
unsah foah-feddah henn uns es fazayld,
vass du gedu hosht in iahra zeit,
in di alda dawwa.
2 Mitt dei aykni hend hosht du di heida ausgedrivva,
un hosht unsah foah-feddah eiksetzt.
Du hosht selli leit nunnah kshlauwa,
avvah dei aykni leit frei gmacht.
3 Mitt iahra aykni shvadda henn si's land nett ivvah-gnumma,
un iahra ayknah oahm hott eena nett ivvah-hand gevva.
Avvah's voah dei rechtsi hand, dei oahm,
un's licht funn dei ksicht,
veil du si leeb katt hosht.
4 Du bisht mei Kaynich, oh Gott,
un machsht es da Jakob ivvah-hand grikt im greek.
5 Deich dich sheeva miah unsah feinda zrikk,
deich dich dredda miah selli nunnah es geyya uns sinn.
6 Ich faloss mich nett uf mei bow,
un mei shvatt gebt miah nett ivvah-hand.
7 Avvah du gebsht uns hilf ivvah unsah feinda,
un fashohmsht selli es uns hassa.
8 Miah hayva da nohma funn Gott uf da gans dawk lang,
un gevva dank zu eem fa'immah.
(Sela)
9 Avvah doch du hosht uns vekk kshtohsa un fashohmd,
un gaysht nimmi mitt uns im greek.
10 Du machsht uns zrikk drayya fannich unsah feinda,
un selli es uns hassa nemma unsah sacha vekk.
11 Du hosht uns gmacht vi shohf fa kshlacht sei,
un hosht uns funn-nannah kshtroit unnich di heida.
12 Du hosht dei leit fakawft fa shiah nix,
un hosht nix raus grikt bei si fakawfa.
13 Du hosht uns en kshpott gmacht zu unsah nochbahra;
si henn uns fashpott un fashohmd zu selli um uns rumm.
14 Du hosht uns en kshvetz gmacht unnich di heida;
si shidla iahra kebb un lacha veyyich uns.
15 Ich binn gedaymeedicht da gans dawk,
un mei ksicht is zu gedekt mitt shohm,
16 veil ich si heah uns faleshtahra un fashpodda,
un unsah feinda sinn am ayva vadda mitt uns.
17 Awl dess is uf uns kumma,
avvah miah henn dich nett fagessa,
un voahra nett falsh mitt dei bund.
18 Unsah hatza henn nett zrikk gedrayt,
un unsah fees sinn nett funn dei pawt ganga.
19 Avvah du hosht uns nunnah kshlauwa un in en blatz funn vildi diahra glost,
un hosht uns zu gedekt mitt deefi finshtahnis.
20 Vann miah unsah Gott sei nohma fagessa hedda,
adda unsah hend naus kshtrekt hedda zu en fremdah gott,
21 dayt Gott dess nett ausfinna?
Fa eah vayst alles es im hatz is.
22 Avvah fa dich sinn miah alli dawk in di kfoah funn doht gmacht sei;
miah sinn gnumma vi shohf fa kshlacht sei.
23 Vekk uf, oh Hah! Favass dusht du shlohfa?
Shtay uf! Shtohs uns nett vekk fa'immah.
24 Favass fashtekkelsht du dei ksicht,
un fagesht vi miah am leida un deich macha sinn?
25 Unsah sayl is nunnah gebohwa in da shtawb;
unsah leib leit uf em grund.
26 Shtay uf un helf uns,
mach uns frei fa di sayk funn dei grohsi leevi.