Da 45. Psalm.
En Hochtzich Leet Fa Kaynicha
En lanning funn di kinnah fumm Korah: En hochtzich leet. Zumm foah-singah.
1 Mei hatz is oahrich froh mitt en goot leet;
dess vill ich singa fa da kaynich.
Mei zung is vi en penn funn en goodah shreivah.
2 Du bisht da shensht unnich di mensha-kinnah;
dei leftz sinn ksalbt mitt gnawt,
un Gott hott dich ksaykend fa'immah.
3 Shnall dei shvatt an dei seit, du Mechtichah,
un glayt dich in kaynichi hallichkeit.
4 In dei hallichkeit foah fassich un nemm ivvah.
Fa di sayk funn voahheit, sanftmoot un gerechtichkeit,
loss dei rechtsi hand vundahboahri sacha du.
5 Loss dei shaufi arrows deich di hatza shtecha
fumm kaynich sei feinda;
loss di heida unnich dei fees falla.
6 Dei kaynich-shtool, oh Gott, bleibt fa'immah un immah;
du saynsht ivvah dei reich in gerechtichkeit.
7 Du leebsht gerechtichkeit un hasht vass gottlohs is.
Fasell hott Gott, dei Gott dich haychah ufketzt
es ennich ebbah shunsht,
bei dich salba mitt em ayl funn frayt.
8 Awl dei glaydah sinn goot-shmakkich gmacht
mitt myrrhe, aloe un kassia.
Fumm ivory-gedekt kaynich-haus,
vasht du froh gmacht vann di harfa kshpeeld vadda.
9 Em kaynich sei mayt sinn gnumma fa selli unnich dei hohch-gachti veibsleit sei,
un an dei rechtsi seit shtayt di kaynich-fraw gedekt mitt gold funn Ophir.
10 Heich, oh dochtah, dray dei oah un denk drivvah,
fagess dei leit un dei daett sei haus.
11 Da kaynich zayld en falanga havva fa dich veil du so shay bisht,
eah is dei meishtah, bikk dich zu eem.
12 'S maydel funn Tyrus zayld kumma mitt en kshenk,
reichi leit gukka fa kfellich vadda zu diah.
13 Gans hallich is di kaynich-dochtah in iahra shtubb,
iahra glaydah sinn gmacht mitt goldichah naytz.
14 In ausgnaydi glaydah zayld see zumm kaynich kfiaht sei,
iahra hochtzich-mayt kumma iahra nohch,
un si vadda zu diah gebrocht.
15 Si vadda nei kfiaht mitt frayt un froiyes,
un gayn nei in's kaynich-haus.
16 Dei boova, oh kaynich, zayla da blatz nemma funn dei feddah,
du machsht si roolahs ivvah di gans eaht.
17 Ich zayl macha es dei nohma nett fagessa gayt funn kind zu kinds-kind,
un fasell zayla leit in anri lendah dich preisa fa'immah un immah.