Es 3. Gabiddel.
Unglawvich Israel
1 Gott sawkt:
“Vann en mann en divorce-shreives zu sei fraw gebt,
un see falost een un heiyaht en anra mann,
sett eah see viddah zrikk nemma?
Dayt sell nett's gans land unrein macha?
Avvah du hosht huahrahrei gedrivva mitt feel mennah—
daytsht du nau zrikk kumma zu miah?”
sawkt da Hah.
2 “Mach dei awwa uf un gukk nuff uf di bludda hivla.
Is ennichah blatz datt es du nett huahrahrei gedrivva hosht?
Du hosht am vayk nohch kokt am voahra uf si,
vi selli in di vildahnis voahra fa ebbah rawva.
Du hosht's land unrein gmacht
mitt dei huahrahrei un ungettlichkeit.
3 Fasell is da free-reyya zrikk kohva vadda,
un da shpoht-reyya is nett kumma.
Du dusht even gukka vi en huah;
avvah du dusht dich nett shemma.
4 Hosht du nett yusht nau mich groofa, un ksawt,
‘Mei Faddah, mei freind funn yungem uf,
5 zaylsht du ayvichlich bays sei?
Zayld dei zann ohhalda fa'immah?’
Sell is vi du shvetsht,
avvah du dusht awl's evila es du kansht.”
6 Deich's reich fumm kaynich Josia hott da Hah ksawt zu miah, “Hosht ksenna vass unglawvich Israel gedu hott? See is nuff uf alli hohchah hivvel, un unnich alli greenah bohm ganga un hott huahrahrei gedrivva datt.
7 Ich habb gedenkt vo see moll dess gedu hott, dann kumd see zrikk zu miah, avvah see is nett. Un iahra unglawvichi shveshtah Juda hott dess ksenna.
8 Ich habb unglawvich Israel en divorce-shreives gevva un see vekk kshikt veil see huahrahrei gedrivva hott. Unglawvich Juda hott dess ksenna avvah see hott sich nett kfeicht. See is aw naus ganga un hott huahrahrei gedrivva.
9 Un veil Israel dee huahrahrei so leicht gnumma hott, hott see's land unrein gmacht bei aybrecha mitt shtay un shtikkah hols.
10 Doch fa awl dess, is iahra unglawvichi shveshtah Juda nett folshtendich zrikk gedrayt zu miah, avvah hott yusht ohglost see dayt,” sawkt da Hah.
11 Da Hah hott ksawt zu miah, “Unglawvich Israel is may gerecht es es falsh land Juda.
12 Gay un breddich dee vadda geyyich di natt:
‘Kumm zrikk, du unglawvich Israel,’ sawkt da Hah,
‘ich gukk nimmi uf dich mitt zann,
fa ich binn bamhatzich,’ sawkt da Hah,
‘un ich zayl nett bays sei fa'immah.
13 Avvah yusht bekenn es du shuldich bisht,
es du geyyich da Hah dei Gott ksindicht hosht,
un bisht hee un heah gloffa mitt fremdi gettah
unnich alli greenah bohm,
un hosht miah nett keicht,’ ”
sawkt da Hah.
14 “Kummet zrikk, diah unglawvichi kinnah,” sawkt da Hah, “fa ich binn eiyah meishtah. Ich nemm aynah funn yaydah shtatt un zvay funn yaydah shtamm un bring eich zu Zion.
15 No gebb ich eich heedah es miah heicha. Si zayla eich foah gay mitt eisicht un veisheit.”
16 Da Hah sawkt, “In selli dawwa vann diah moll feel vaddet im land, dann zayla leit nimmi sawwa, ‘Di Bundes-Lawt fumm Hah.’ Si zayla nett an see denka un zayla see fagessa. Si braucha see nett un's zayld kenn anri gmacht vadda.
17 An selli zeit zayld Jerusalem ‘Da Kaynich-Shtool fumm Hah’ kaysa sei, un's folk funn awl di lendah kumma zammah in Jerusalem fa em Hah sei nohma eahra. No zayla si iahra shteibahrichi un evili hatza nimmi nohch lawfa.
18 In selli dawwa zayld's haus funn Juda zammah gay mitt em haus funn Israel un si zayla mitt-nannah runnah kumma funn en land in di natt in's land es ich iahra foah-feddah gevva habb fa en eahbshaft.
19 Ich selvaht habb ksawt:
‘Vi froh veah ich fa dich eahra unnich mei kinnah,
un diah en leeblich land gevva,
di shensht eahbshaft unnich awl di lendah.
Ich habb gedenkt du daytsht mich “Leevah Faddah” haysa,
un nett vekk drayya funn miah nohch kumma.
20 Avvah vi en fraw es di ay brecht mitt iahrem mann,
so hott's haus funn Israel di ay gebrocha mitt miah,’ ”
sawkt da Hah.
21 En shtimm vatt keaht uf di bludda hivla;
es is di Kinnah-Israel am heila un veina,
veil si evil gedu henn,
un henn da Hah iahra Gott fagessa.
22 “Kummet zrikk diah unglawvichi kinnah;
ich hayl eich un mach eich shtandhaftich.”
Di leit sawwa, “Yau, miah kumma zu diah,
fa du bisht da Hah unsah Gott.
23 Gevislich, di abgott savvahrei in di hivla
un uf di berga hott uns fafiaht kalda;
voahlich, di aynsisht hilf fa Israel
kumd fumm Hah unsah Gott.
24 Funn yungem uf henn di shandlicha gettah
di frucht funn unsah feddah iahra eahvet ufkfressa—
iahra shohf un kee,
un iahra boova un mayt.
25 Miah sedda uns anna layya in unsah shohm,
un dess shandlich ding uns zu dekka lossa.
Miah henn ksindicht geyyich da Hah unsah Gott,
miah un unsah foah-feddah,
funn yungem uf biss heit;
miah henn em Hah unsah Gott nett keicht.”