Es 36. Gabiddel.
1 Da Elihu hott veidah ksawt,
2 “Heah mich noch bissel lengah ab, no veis ich diah,
es noch may ksawt sei kann fa Gott.
3 Ich grikk vass ich vays funn veit ab,
un ich zayl veisa es mei Sheffah gerecht is.
4 Du solsht vissa es mei vadda nett falsh sinn;
aynah es alles fashtayt is bei diah.
5 Gott is mechtich avvah eah fa'acht nimmand,
eah is mechtich in vass eah fashtayt.
6 Eah hald di gottlohsa nett levendich,
avvah eah gebt di aylendicha iahra recht.
7 Eah nemd sei awwa nett ab funn di gerechta;
eah hokt si uf kaynich-shteel mitt kaynicha,
un gebt eena ayvichi eah.
8 Avvah vann si gebunna sinn mitt kedda,
un kfanga sinn mitt di shtrikk funn di aylendicha,
9 no sawkt eah eena vass si gedu henn,
es si ksindicht henn mitt shtolsheit.
10 Eah macht si abheicha zu sei vanning,
un sawkt eena es si sich vekk funn evil drayya sella.
11 Vann si een abheicha un een deena,
dann layva si's ivvahrich funn iahra layva unni noht,
un iahra yoahra in blesiah.
12 Avvah vann si nett heicha,
dann kumma si um mitt em shvatt,
un shtauva unni ebbes fashtay.
13 Avvah di gottlohsa im hatz henn innahlichah zann,
si frohwa nett fa hilf vann eah si bind.
14 Si shtauva yung,
un layva unnich di huahra im tempel.
15 Eah setzt di aylendicha frei funn iahra aylend,
un shvetzt zu eena in iahra dreebsawl.
16 Eah lokt dich aus em maul funn dreebsawl,
zu en grohsah blatz vo nimmand dich zrikk haybt,
un vo dei dish grisht is mitt goot ess-sach.
17 Nau bisht du am gricht vadda mitt em gericht es zu di gottlohsa heaht,
un du kansht nett vekk fumm shtrohf es eah diah gebt.
18 Loss nett zann dich vekk lokka fa reich vadda,
un dray nett vekk bei geld nemma hinna rumm.
19 Dayt dei geld adda dei gvald
dich halda funn angsht havva?
20 Hayb nett en falanga fa di nacht,
vann leit vekk gnumma vadda funn iahra shtett.
21 Gebb acht es du dich nett ivvah-draysht zumm evila,
dess es du leevah hetsht es aylend.
22 Gukk moll, Gott is hohch uf kohva in sei graft;
vo is en leahrah vi eah is?
23 Veah hott eem ksawt vass zu du,
adda ksawt zu eem, ‘Du hosht letz gedu’?
24 Fagess nett fa sei eahvet preisa,
funn demm es leit singa diveyya.
25 Awl di mensha henn dess ksenna,
leit sayna's funn veit ab.
26 Gukk moll, Gott is grohs, un miah doon een nett kenna,
miah kenna nett zayla vi ald es eah is.
27 Eah zeekt di vassah drobba nuff,
un drayt da nevvel zu reyyah.
28 Di volka leahra vassah runnah,
un's fald runnah uf di mensha.
29 Veah kann fashtay vi eah di volka ausnannah dutt,
adda vi's gviddah yacht macht im himmel vo Gott bleibt.
30 Gukk moll vi eah's gviddah ausnannah shikt es um een rumm is,
un dekt da deef say zu.
31 Sell is vi eah di leit richta dutt,
un gebt eena feel ess-sach.
32 Eah nemd's gviddah in sei hend,
un hayst's fa gay un sei meik dreffa.
33 Di yacht fumm gviddah gebt en vanning fumm shtoahm,
even's fee vayst vass am kumma is.”