Es 35. Gabiddel.
Da Elihu Hald Oh Shvetza
1 Da Elihu hott no veidah ksawt,
2 “Nemsht du dess fa recht sei,
vann du sawksht, ‘Ich binn may gerecht es Gott?’
3 Du sawksht, ‘Vass goot dutt's miah;
vi binn ich bessah ab bei nett sindicha?’
4 Ich gebb andvat zu diah,
un aw zu dei freind do mitt diah.
5 Gukk moll nuff in da himmel un sayn;
gukk moll an di volka hohch ovvich diah.
6 Vann du sindichsht, vi dutt sell eem shawda?
Vann dei sinda feel sinn, vass dutt sell zu eem?
7 Vann du gerecht bisht, vass gebsht du zu eem,
adda vass grikt eah funn dei hand?
8 Dei ungerechtichkeit kann yusht ebbes du zu mensha vi du,
un dei gerechtichkeit zu di mensha-kinnah.
9 Veil leit oahrich nunnah gedredda sinn, doon si naus roofa,
si roofa fa abglawda sei fumm oahm funn di mechticha.
10 Avvah nimmand sawkt, ‘Vo is Gott, deah es mich gmacht hott,
deah es lohb-leedah gebt in di nacht,
11 deah es uns may land es di diahra uf di eaht,
un gebt uns may veisheit es di fekkel im himmel?’
12 Eah gebt kenn andvat vann leit roofa zu eem,
deich da hohchmoot funn di gottlohsa.
13 Es dutt si kenn goot fa roofa, veil Gott si nett abheicht,
un da Awlmechtich fa'acht si.
14 Vee feel vennichah, dann, dutt eah dich abheicha
vann du sawksht du saynsht een nett,
es du bisht am voahra fa sei gericht,
un musht voahra uf een?
15 Un nau, veil Gott in seim zann nett kshtrohft hott,
un sich nett oahrich bekimmaht hott veyyich ungerechtichkeit,
16 dann dutt da Hiob sei maul uf macha mitt leahri vadda;
eah hald oh shvetza un vayst nix.”