Es 37. Gabiddel.
1 “Da shtoahm macht mei hatz globba,
un's tshumbt innahlich rumm.
2 Heichet goot ab zumm gedimmel funn sei shtimm,
un's gebrumm es aus seim maul kumd.
3 Eah macht's gviddah unnich em himmel lohs,
un shikt's zu's end funn di veld.
4 Noch sellem kumd di yacht funn sei shtimm,
eah dimmeld mitt en mechtichi shtimm.
Vann sei shtimm keaht is,
dann haybt eah nix zrikk.
5 Gott sei shtimm dimmeld in vundahboahri vayya,
eah dutt grohsi sacha es miah nett fashtay kenna.
6 Eah sawkt zumm shnay, ‘Fall uf di eaht,’
un zumm reyyah, ‘Leah shteik aus.’
7 Eah shtobt di eahvet funn alli mann sei hand,
so es alli-ebbah vissa kann vi eah shaft.
8 Di vilda diahra gayn nei,
si bleiva in iahra lechah.
9 Funn di saut kumd da shtoahm,
un funn di natt da kald vind.
10 Gott sei ohften macht ice,
un di grohsa vassahra vadda kfroahra.
11 Eah macht di volka shveah mitt vassah,
un aus di volka shikt eah gviddah.
12 Eah macht di volka sich rumm drayya,
ivvahrawlich ivvah di gans eaht;
si doon vass-evvah es eah havva vill.
13 Eah shikt reyyah fa di eaht vessahra,
eah mecht's shikka fa leit shtrohfa, adda fa sei shtandhaftichi-leevi veisa.
14 Nau heich moll, Hiob,
shtobb un denk ivvah di vundahboahri sacha funn Gott.
15 Vaysht du vi Gott di volka macht eem heicha,
un's gviddah macht blitza aus di volka?
16 Vaysht du vi di volka sich ausnannah shtroiya,
di verka funn demm es alles fashtayt?
17 Du es hays bisht in dei glaydah,
vann's land shtill is veil da vind funn di saut is,
18 kansht du eem helfa da himmel ausshtrekka,
un en so hatt macha es en gegossanah shpikkel.
19 Sawk uns vass miah sawwa sedda zu eem,
miah sinn im dunkla un vissa nix.
20 Sett's eem ksawt sei es ich shvetza vill?
Veah ennich ebbah so dumm es eah ufkshlukt sei vett?
21 Nimmand kann in's licht gukka,
es is zu hell im himmel,
vann da vind di volka vekk geblohsa hott.
22 Aus di natt kumd en goldichah shein,
Gott is geglayt mitt en shreklichi hallichkeit.
23 Da Awlmechtich kenna miah nett finna,
eah is zu mechtich mitt graft.
Sei gerechtichkeit un gericht dutt eah nett beeya.
24 Fasell doon leit een firchta,
un eah fa'acht selli es mayna si henn veisheit.”