67
Se huicat para quitascamatis Toteco
1 Toteco Dios, xijpiya hueyi moyolo ica tojuanti huan techtiochihua.
Ma petani moxayac pampa tipaqui ica tojuanti quema techhualtachilía hasta ten nepa ilhuicac.
2 Nochi masehualme ipan taltipacti ma quiixmatica moojhui.
Masehualme ipan nochi talme ma quimatica para ta titemaquixtía.
3 NoTeco Dios, ma mitzpaquilismacaca nochi masehualme ipan taltipacti.
Quena, nochi masehualme ma mitzhueyimatica.
4 ¡Ma paquica nochi masehualme ipan nochi talme huan ma huicaca pampa ta, tiinintanahuatijca!
Ta tiquintajtolsencahuas quej quinamiqui,
huan nochi talme tiquinyacanas xitahuac.
5 ¡NoTeco Dios, ma mitzpaquilismacaca nochi ipan taltipacti!
¡Quena, nochi masehualme ma mitzhueyimatica!
6 Ni tali temacatoc miyac pixquisti, pampa ta, Toteco Dios,
cati titoDios tojuanti, tahuel techtiochijtoc.
7 Quena, noja más techtiochihuas, Toteco Dios,
huan masehualme campa hueli ipan ni taltipacti mitztepanitase huan mitzimacasise mitzixpanose.