66
Se huicat para quitascamatis Toteco
1 ¡Nochi anmasehualme ipan taltipacti,
xihuicaca ica paquilisti para Toteco Dios!
2 ¡Xihuicaca tiohuicat cati tepohuilía para tahuel hueyi ya!
¡Xijhueyimatica por nochi cati quichijtoc!
3 Xiquilhuica Toteco Dios:
“¡Nelía cuajcualtzi huan temajmati nochi cati tijchijtoc!
¡Tahuel hueyi mochicahualis!
Yeca nochi mocualancaitacahua motemactilíaj ica ta pampa tahuel temajmati cati tijchihua.
4 Nochi masehualme ipan taltipacti mitzhueyichihuase.
Inijuanti huicase para mitzhueyimatise,
huan tepohuilise ten mohueyitilis.”
5 Xihualaca huan xiquitaquij nochi nopa huejhueyi tamanti cati Toteco Dios quichijtoc.
¡Quinchihuilijtoc masehualme huejhueyi tiochicahualnescayot!
6 Quihuatzqui nopa at huan tatajco nopa hueyi at quitapo se ojti huactoc campa panoque tohuejcapan tatahua.
¡Nochi israelitame quipixque se hueyi paquilisti ipan nopa tonali!
7 Toteco ica ichicahualis tanahuatía para nochipa.
Yaya quitachilía sesen tamanti cati masehualme quichihuaj ipan nochi talme ipan taltipacti.
Cati amo quitepanitaj huan cati mohueyimatij,
yaya quinechcapantalis.
8 Nochi anmasehualme xijtascamatica Toteco Dios huan xijhueyimatica,
por nochi cati quichijtoc,
9 pampa sesen ten tojuanti tonemilis eltoc imaco.
Quena, yaya techmocuitahuijtoc huan techyacantoc xitahuac ipan toojhui.
10 Pampa ta, tiToteco Dios, techyejyecojtoc huan techtapajpacchijtoc,
quej nopa tepos plata cati quimoloníaj ipan tit cati tahuel totonic,
para san mocahuas cati senquisa cuali.
11 Ta techmasilti ipan momata huan tijtali tocuitapa tamamali cati tahuel etic.
12 Tijchijqui para nopa masehualme ten sequinoc talme ma moquejquetzaca topani ica cahuayojme.
Tipanoque ipan at huan ipan tit.
Pero ama techtiochijtoc huan techmacatoc nochi cati cuali.
13 Ama nihualajtoc ipan motiopa para nimitzmacas tacajcahualisti tatatili.
Huan quej nopa nijtamichihuas cati nimitztajtolcahuilijtoc para nijchihuas.
14 Pampa quema niitztoya ipan taohuijcayot, nimitztajtolcahuili ica nocamac,
para nimitzmacas miyac tacajcahualisti.
15 Yeca ama nimitzhualiquilía ni oquich borregojme, chivojme huan becerros cati tomahuaque.
Huan ininpocyo tejcos hasta ajsis moixpa.
16 Nochi amojuanti cati anquitepanitaj Toteco Dios huan anquiimacasij anquiixpanose,
xihualaca xijtacaquiliquij,
huan nimechpohuilis nochi cati yaya nechchihuilijtoc.
17 Chicahuac na nijtzajtzili para ma nechpalehui,
huan quema nijcamanalhuiyaya, nijhueyimatiyaya.
18 Pero sinta na nijpiyasquía tajtacoli ipan noyolo,
huajca amo nechtacaquilijtosquía.
19 Pero pampa niquilhui Toteco Dios ma nechtapojpolhui,
yaya nechtacaquili huan quichijqui cati niquilhui.
20 Xijpaquilismacaca Toteco Dios,
pampa yaya nechtacaquili huan amo quihuejcamajcajqui nocamanal quema nimotatajti.
Nechtasojtac huan nechicneli.