68
Toteco Dios tatantoc
1 ¡Ximotanana, Toteco Dios, huan xiquinsemana nochi mocualancaitacahua!
Xiquinchihua ma choloca moixpa nochi cati amo quinequij mitzitase.
2 Xiquinixpolo quej pocti ixpolihui ipan ajacat.
Xiquintamilti quej nopa cantela cati atiya ipan tit.
Quej nopa ma ininpanti moixpa nochi amo cuajcualme.
3 Pero nochi masehualme cati itztoque xitahuaque ma paquica iixpa Toteco Dios huan ma huitonica ica paquilisti.
4 Xijhuicatica Toteco huan xijpaquilismacaca.
Xijhueyitalica yaya cati nejnemi iixco mixti,
yaya cati itoca TOTECO.
Xipaquica miyac iixpa ya.
5 Toteco Dios yaya inintata cati icnotzitzi.
Yaya quinchihuilía cati xitahuac nopa sihuame icnotzitzi,
pampa yaya tatzejtzeloltic.
6 Toteco Dios quinmaca se familia cati itztoque iniselti.
Huan quinchololtía cati quintzactoque.
Pero cati motepanitaj quintitanilía mayanti huan taijyohuilisti.
7 NoTeco Dios, quema tiquinyacantiyajqui momasehualhua ten tali Egipto
huan tiquinhuicac ipan nopa huactoc tali,
8 nopa tali mohuiso huan huetzqui at ten ilhuicacti moixpa.
Nopa tepet Sinaí mohuiso moixpa ta cati titoTeco tiisraelitame.
9 Toteco Dios, ta tijchijqui ma huetzi miyac at ipan ni tali cati tiquinmacac momasehualhua.
Quena, ica nopa at tiquinfuerzajmacac cati moaxcahua quema tahuel siyajtoyaj.
10 Yeca momasehualhua mocajque nica ipan ni tali.
Huan ta ica motaicnelijcayo tiquinmacac nopa teicneltzitzi nochi cati monequiyaya para ica mopanoltise.
11 Toteco quiijto para ya tatantoya,
huan miyac masehualme tzajtzique chicahuac para tepohuilise ten panotoc.
Quiijtojque:
12 “Cholojtejque nopa soldados cati hualajtoyaj para techtzontamiltise.”
Quena, ama nopa israelita sihuame momajmacaj nochi tamanti cati quicajtejque nopa soldados.
13 Xiquitaca, masque quinmocuitahuiyayaj borregojme,
ama nopa sihuame hasta petanij ica oro huan plata.
Nochi inintacayo quitamitzactoque ica tamantzitzi cati cuajcualtzitzi quej se paloma quitamitzacua itacayo ica ieltapal.
14 Toteco Dios Cati Quipiya Nochi Chicahualisti quinsemanqui icualancaitacahua quej nopa tasesecayot cati huetzi ipan tepet Salmón.
15 Nochi nopa tepeme cati huejcapantique cati mopantíaj ipan tali Basán iaxcahua Toteco huan nelía cuajcualtzi inintzonatipa,
16 pero ma amo mochicoitaca ica nopa Tepet Sion cati TOTECO quitapejpenijtoc para ipan itztos para nochipa.
17 Toteco Dios quisqui ipan tepet Sinaí ica millones icuacarrojhua huan iilhuica ejcahua.
Yaya yajqui ipan itiopa cati tatzejtzeloltic ipan tepet Sion.
18 Quema Toteco tejcoc ilhuicac campa más huejcapa,
quichihuayaya quej se tatanquet cati mocuepa ipan se tatehuilisti,
huan quinhuicac ilpitoque nopa masehualme cati quintantoya para iaxcahua.
Huan nopa tonali Toteco quiseli nemacti ten nochi masehualme,
hasta nojquiya ten masehualme cati amo quinequiyayaj quitepanitase.
Huan ama TOTECO temachti itztos ica tojuanti.
19 Ma tijpaquilismacaca Toteco,
pampa yaya mojmosta techmaca itatiochihualis.
Yaya Toteco cati techpalehuía huan techmaquixtía.
20 Toteco Dios, yaya cati techchololtía inimaco tocualancaitacahua.
Huan yaya Toteco cati techmanahuía para amo timiquise.
21 Temachti Toteco quintzontamiltis nochi icualancaitacahua,
pampa inijuanti tahuel yoltetique huan amo quinequij quicahuase inintajtacolhua.
22 Toteco quinilhuijtoc imasehualhua:
“Na niquinhualicas nochi amocualancaitacahua.
Niquincuiti masque motatijtose ipan nopa huejcapantic tepet cati itoca Basán,
o masque motatijtose hasta tatzinta ten nopa hueyi at.
23 Niquinhualicas pampa monequi nochi anquintzontamiltise.
Inieso quixolonise amoicxihua huan amochichihua quipipitzose.”
24 NoTeco Dios, tinotanahuatijca,
niquinita miyac masehualme mitztoquilíaj para yase ipan motiopa.
25 Inijuanti cati huicaj tayacantiyahuij.
Tatajco yahuij nopa ichpocame cati quitzilinijtiyahuij panderos.
Tatepotzco yahuij cati tatzotzonaj.
26 Huan quej ni huicaj:
“Nochi anisraelitame, xijhueyimatica Toteco Dios.
Xijpaquilismacaca Toteco cati techmacatoc nemilisti nochi tojuanti.”
27 Tayacantiyahuij iixhuihua Benjamín.
Huan tatepotzco hualahuij nopa tayacanani huan huehue tacame ten iixhuihua Judá,
huan nopa tayacanani cati iixhuihua Zabulón huan Neftalí.
28 Toteco Dios, ica mohueyi chicahualis xijchihua nochi cati techilhuijtoc.
Quena, xijnexti mohueyi chicahualis para sequinoc ma quiitaca nopa huejhueyi tamanti cati ta techchihuilijtoc.
29 Nopa tanahuatiani ten nochi talme quihualicaj iniofrendas ipan motiopa cati eltoc ipan altepet Jerusalén.
30 Toteco Dios, xiquinajhua tocualancaitacahua.
Xiquinechcapantali nopa tacame cati mosisiníaj quej torojme,
huan xiquinchihua ma motemactilica ica ta.
Ma mitzhualiquilica inintepos plata quej se nemacti.
Xiquinsemana nopa mosisinijca masehualme cati tahuel quinpactía tatehuise.
31 Nopa Egipto ehuani quinhualicase inintelpocahua huan nochi tamanti ininteposhua cati cuajcualtzitzi huan pajpatiyo.
Huan nopa Etiopía ehuani momatananase moixpa para mitzhueyichihuase.
32 Nochi antanahuatiani ipan nochi ni taltipacti,
xijhuicatica Toteco Dios.
Xihuicaca huan xijpaquilismacaca Toteco.
33 Yaya cati nentinemi ipan nopa ilhuicacti cati hasta huejcajquiya eltoc.
Xijcaquica itoscac cati chicahuac caquisti quej quema tatomoni.
34 Xiquinpohuilica nochi masehualme quenicatza hueyi ichicahualis Toteco Dios.
Huan itatanex ajsi ipan nochi israelitame.
Quena, nelía tahuel hueyi ichicahualis nepa ilhuicac.
35 Ma tijhueyitepanitaca Toteco Dios pampa temajmati ihueyitilis nopona ipan itiopa.
ToDios tiisraelitame quinmaca tetili huan chicahualisti nochi imasehualhua.
¡Ma tijpaquilismacaca Toteco Dios!