42
Israelitame cati quinhuicatoque seyoc tali quielnamiquij inintal
1 Quej se masat cati tahuel amiqui quitemojtinemi se atajti para atis,
quej nopa na nimitzyoltemohua, noTeco Dios.
2 Quena, quej se cati tahuel amiqui,
na ipan noyolo nimitznequi Toteco,
ta cati nelnelía tiitztoc.
¿Hasta quema huelis niyas huan nimonextis moixpa?
3 Tayohua huan tonaya nichoca huan amo nitacua.
Nocualancaitacahua talojtzitzi nechtatzintoquilíaj:
“¿Canque itztoc moDios?
¿Para ten amo mitzpalehuía?”
Quej nopa nechilhuíaj.
4 Quema niquelnamiqui quenicatza eliyaya achtohuiya nepa ipan notal, eltoc quej atiya noyolo.
Niyahuiyaya inihuaya miyaqui masehualme hasta ichaj Toteco Dios.
Na niquinyacanayaya nochi hasta ichaj ipan nopa hueyi ilhuit.
Titzajtzitiyahuiyayaj ica paquilisti,
huan tijtascamatiyayaj Toteco Dios pampa para ya tiilhuichihuayayaj.
5 Huajca nimoilhuía:
“Amo monequi nimotequipachos.
Na nimotemachijtoc ipan noTeco Dios,
huan sempa nijpaquilismacas,
pampa yaya noDios huan notemaquixtijca.”
6 Pero noTeco, nelía nimotequipachohua nica campa niitztoc ipan ni tali cati huejca.
Yeca nimitzelnamiquis,
huan niquelnamiquis quenicatza tijpixqui hueyi moyolo ica tojuanti cati tiehuani ipan motal.
Niquelnamiqui nopa tali cuajcualtzi cati pehua campa motalohua nopa atajti Jordán,
huan ontami hasta campa motanantoc nopa tepeme Hermón huan Mizar.
7 Ama ta techtitanilijtoc tequipacholi cati nechijyomictía.
Quena, miyac tequipacholi nechajsitoc quej imiyaca at cati huetzi ten tepeixco hasta ipan na.
Caquisti quej miyac at cati ajcahuacatoc,
huan nochi nopa at nopan panotoc.
8 Pero ica ijnaloc TOTECO nechtitanilis itaicnelilis.
Huan ica tayohua yaya nechmacas se huicat para nijhueyichihuas,
huan nimotatajtis ica ya.
Quena, nijnojnotza NoTeco cati mojmosta nechmaca nemilisti.
9 Niquilhuis Toteco Dios:
“Ipan ta nimotatía huan amo aqui hueli nechajsis.
¿Para ten techelcajtoc?
Na san nimotequipachojtinemi,
pampa nocualancaitacahua nechtaijyohuiltíaj.
10 Cati nocualancaitacahua nechchihuilíaj nechcocohua hasta ajsi ipan noomiyohua,
pampa nechtaijilhuíaj huan nechtatzintoquilíaj talojtzitzi:
‘¿Canque itztoc moDios?
¿Para ten amo mitzpalehuía?’ ”
11 Pero amo monequi nimocuesihuilmacas,
yon nimotequipachos.
Na nimotemachijtoc ipan noTeco Dios,
huan teipa sempa nijpaquilismacas pampa yaya noDios huan noTemaquixtijca.