43
Se netatajtili para quitajtanis Toteco ma quinhuica ipan inintal
1 NoTeco Dios, techtajtolsencahua xitahuac huan xitenextili para amo teno nijchijtoc.
Techmanahui ten ni istacatica masehualme huan amo cuajcualme cati nechtelhuíaj.
2 Pampa san ta tinoTeco huan tinoDios huan notamanahuijca na.
¿Para ten techtahuelcajtoc?
Nimotequipachojtinemi huan más nechtaijyohuiltíaj nocualancaitacahua,
huan amo teno tijchihua.
3 Toteco Dios, techyacana ica motaahuil huan technextili cati melahuac.
Quej nopa, quena, huelis niyas ipan motal huan campa motepe cati tatzejtzeloltic campa ta tiitztoc ipan motiopa.
4 Quena, noTeco Dios, nicalaquis huan niajsiti hasta motaixpa campa masehualme mitzhueyichihuaj.
Nepa nimitzpaquilismacas ica arpa, ta cati techmaca paquilisti,
pampa ta tinoTeco Dios.
5 San tapic nimotequipachos.
Na nimotemachijtoc ipan ta, noTeco Dios, huan sempa nimitzpaquilismacas,
pampa, ta tinoDios, huan tinotemaquixtijca.