41
David cati mococohua quitajtanía Toteco ma quichicahua
1 Paqui nopa masehuali cati motequipachohua pampa quinicnelía cati teicneltzitzi,
pampa TOTECO quipalehuis quema hualas taohuijcayot.
2 TOTECO quimocuitahuis para amo aqui quimictis.
Huan TOTECO quitiochihuas miyacapa ipan tali Israel.
Yaya amo quicajtehuas,
yon amo quicahuas inimaco icualancaitacahua para ma quichihuilica cati inijuanti quinequise.
3 Quema huetztos ipan taijyohuilisti,
TOTECO quitananas ipan itapech huan quiijcuenilis nopa cocolisti.
4 Na niquilhui TOTECO:
“TOTECO, na nitajtacolchijtoc ica ta.
Techtasojta huan techchicahua.”
5 Nocualancaitacahua quinequij ma nechajsi cati fiero.
Camanaltij fiero ten na huan quinequij ma nimiqui huan ayecmo aqui nechelnamiquis.
6 Quema nechpaxalohuaj, mochihuaj quej nohuampoyohua,
pero amo melahuac ten quiijtohuaj.
Quema itztoque nohuaya san quitacaquilíaj taya onca para huelis quipatase ica cati más fiero,
huan teipa quisase huan teyolmelajtinemise ten na.
7 Quena, nocualancaitacahua mosentilíaj huan noca camanaltij.
Tepohuilíaj para ayecmo onca pajti para na huan nimantzi nimiquis.
8 Quiijtohuaj:
“Nopa cocolisti cati yaya quipixtoc nelfiero.
Ayecmo motananas ten itapech pampa nimantzi miquis.”
Quej nopa quiijtohuaj ten na.
9 Nojquiya nechcajtejtoc cati eliyaya nonelhuampo.
Yaya cati ipan nimotemachiyaya huan cati tacuayaya nohuaya, ama nechtahuelcajtoc.
10 Pero ta TOTECO, techtasojta.
Techtanana ten notapech huan niquincuepilis quej nechchihuilijtoque.
11 Nijmati techicnelía pampa amo tiquincahuilijtoc nocualancaitacahua ma nechtanica.
12 Techpalehui pampa nijchihua cati xitahuac huan techmacatoc tequiticayot ma niitzto nepa moixpa para nochipa.
13 Ma tijhueyichihuaca TOTECO,
yaya cati iTeco tohuejcapan tata, Israel.
Quena, ma tijhueyichihuaca ama huan nochipa. Quej nopa ma eli.