112
Toteco quinhueyitalía cati quihueyitepanitaj
1 ¡Miyac paquilisti quipiya nopa masehuali cati quiimacasi TOTECO!
Quena, nochi cati quinpactía quichijtinemise cati quiijtohuaj itanahuatilhua Toteco tahuel paquij.
2 Iniixhuihua ni masehualme quipantise tatepanitacayot campa hueli,
Pampa Toteco quintiochihua hasta iixhuihua se cati monejnemiltía xitahuac iixpa.
3 Ipan ichaj se masehuali cati quintepanita itanahuatilhua Toteco,
onca ricojyot huan miyac tamanti cati cuali,
pampa yaya quichihua cati xitahuac huan cati cuali,
amo quema quielcahuase.
4 Ni masehuali itztoc quej se taahuili cati taahuía ipan tzintayohuilot.
Yaya tetasojta huan teicnelía huan techihuilía cati xitahuac.
5 Se tacat cati cuali iyolo tetasojta huan tetanejtía cati quipiya.
Nochi cati quichihua quisa cuali,
huan quiyacana xitahuac nochi tamanti cati eltoc imaco.
6 Se tacat cati quej ni quichihua,
amo huetzis quema hualas taohuijcayot.
Masehualme cati cuajcualme quielnamiquise para nochipa.
7 Yaya amo majmahui masque quiyolmelahuaj se camanali cati temajmatía,
pampa yaya senquisa motemachijtoc ipan TOTECO para quimocuitahuis.
8 Yaya quipiya temachili ipan iyolo huan amo majmahui.
Senquisa mosemaca huan motehuis chicahuac ica icualancaitacahua.
9 Yaya quinpalehuía miyac cati teicneltzitzi huan cati amo teno quipiyaj.
Por nochi nopa tamanti cuali cati quichihua,
amo quema quielcahuase masehualme.
Nochi quicualitase huan quitepanitase.
10 Quema nopa fiero masehualme quiitase ni cuali tacat huan quenicatza masehualme quitepanitaj,
cualanise chicahuac hasta tanhuehuechocase pampa quichicoitase.
Pero teipa mopinahualtise pampa quiitase para ayecmo teno hueli quichihuase.