113
Toteco quitanana se cati teicneltzi
1 ¡Xijpaquilismacaca TOTECO!
¡Quena, nochi amojuanti cati anitequipanojcahua TOTECO, xijhueyimatica!
2 Ma tijhueyimatica TOTECO ama huan para nochipa.
3 Quena, nochi masehualme ten campa quisa tonati hasta campa oncalaqui ma quihueyimatica TOTECO.
4 TOTECO quipiya tanahuatili ica nochi cati itztoque ipan nochi talme.
Huan ihueyitilis conpano ilhuicacti.
5 ¿Ajquiya seyoc más hueyi quej TOTECO toDios cati mosehuía nepa huejcapa para tanahuatis?
6 Tatzinta ten ya eltoc ilhuicacti huan taltipacti.
Huan yaya mohuijtzoma para tachiyas ipan ni taltipacti.
7 Huan quitanana nopa teicneltzi cati eltoc quej masitoc ipan soquit cati huejcata.
Huan cati huetztoc campa quitepehuaj tasoli quitanana huan quisehuía campa cuali.
8 Quena, quitanana huan quisehuía inihuaya huejhueyi tacame
cati quinyacanaj inialtepet ehuani.
9 Yaya quichihua para nopa sihuat cati amo quema conepixqui
ma quinpiya iconehua huan ichaj.
Quena, quichihua ma eli se tenanti cati senpactoc.
¡Paquilisti!