111
Toteco quinmocuitahuía imasehualhua
1 ¡Paquilisti!
Ica nochi noyolo nijnequi nijtascamatis TOTECO,
campa mosentilíaj masehualme cati itztoque xitahuaque.
2 Huejhueyi tamanti quichijtoc TOTECO.
Nochi cati quiicnelíaj ma moyolilhuica ten nochi ni tamanti cati quichijtoc.
3 Pampa tahuel cuajcualtzi nochi nopa huejhueyi tiochicahualnescayot cati quichihua.
Huan technextilía ihueyitilis huan para yaya nochipa quichihua cati xitahuac.
4 TOTECO quichijtoc huejhueyi tamanti cati amo huelis tiquelcahuase.
Quichijtoc tamanti cati technextilía para techicnelía huan para yaya quipiya hueyi iyolo ica tojuanti.
5 Yaya quinmaca tacualisti nochi cati motemachíaj ipan ya.
Huan amo quema quielcahuas cati techtajtolcahuilijtoc techchihuilis.
6 Toteco quinextijtoc ihueyi chicahualis ica imasehualhua pampa yaya quinmacac nopa tali Israel,
masque achtohuiya eliyaya iniaxca sequinoc tamanti masehualme.
7 Nochi cati Toteco quichihua eltoc senquisa xitahuac huan cuali.
Huan nochi itanahuatilhua nelía temachti.
8 Para nochipa technextilía cati melahuac huan cati xitahuac,
huan monequi tijchihuase cati melahuac huan tijneltocase.
9 TOTECO ya taxtajtoc nochi para quinmanahuis imasehualhua.
Huan quinilhuijtoc imasehualhua para quichihuas nochi cati quintencahuili ipan nopa camanal sencahuali.
¡Toteco nelía tatzejtzeloltic huan temajmati!
10 Para tipehuase tijpiyase talnamiquilisti,
achtohui monequi tiquimacasise huan tijtepanitase Toteco Dios.
Mochihuaj nelía talnamiquini nopa masehualme cati quintepanitaj itanahuatilhua.
Ma tijpaquilismacaca para nochipa.