2
Padahk Mehlel
1 A koah uhdahn padahkki padahk ma pwung oang padahk mehlel kan.
2 Kaweid irai woal mah kan en kak koaunda pein irai, lelpoak, apel lamlam mwehu; irai en sihkei nehn arai pwojon, ipwil, apel engdehn anjoau apwal kan.
3 In joangoan mwomw oauwe, kaweid irai li mah kan en mour doahroar li ma koanoahng mourki mour joaroawi. Irai anahne joah wia sohn karaun likamw ke lidu in wain. Irai anahne padahkki da ma mwehu,
4 pwa irai en kak kaihahnihda li pwulopwul kan en ipwilki pahioarai kan apel nihrai jeri kan,
5 en kak pein koaunda irai apel mwakelkel, apel en wia li pwoapwoaud mwehu ma kin peikkoang pahioarai kan, pwa en joh armaj koauwe en Koahs Mahjanno.
6 In joangoan mwommwohr, kangoange woal pwulopwul kan en kak koaunda pein irai.
7 Nehn joang ohroj, pein koah anahne wia sohn kahlmoang mwehu men oang wihwia mwehu. Koah en mehlel apel injino nehn oamw padahk kan.
8 Koah en doadoahkki lal mwakelkel ma joh koaupoa, pwa oamw imwinsihsi kan en mehkkihda ahr johkak kidalda mehkij nauna mihn koauwe kisai.
9 Liduhkan en kin peikkoang arai koaun kan, apel kainjenmwahuwi irai nehn joang ohroj. Irai en joah kapwur lal,
10 ke pirapoa irai. A irai en kajalehda arai mour mwehu apel mehlel anjoau ohroj, pwa en mine lingin ahr padpadahkki Koahs asai Jounkoamoaur nehn joang ohroj irai wia.
11 Pwa Koahs ne kajalehda Ah kalahngan oang koamoaurro oang armaj ohroj.
12 Kalahngan oauwo kin kaweid kisai en kerpwihla mour in joah pwojon Koahs apel inoang in jampah kan; a kisai en mourki mour in pwojon Koahs, koaunda pein kisai, apel inen nehn jampahioauwe,
13 nehn asai pirin jowihdo Rehnin kapai, ma kisai kin kajkajik, nehn anjoauwo ma lingin asai Koahs Laplap apel asai Jounkoamoaur Jesus Christ pirin pwokdo.
14 Ih sohnmeseikihla pein Ih ki kisai, pwa en kapisla kisai jang joang nauna ohroj apel kamwkelehda kisai, pwa kisai en wiahla Nah kalahpwuk apel ngoangki wia me mwehu.
15 Padahkki mehpwiai apel doadoahkki oamw manman ohroj nehn oamw kangoange apel koapwungi sohn rongrong kan. Mweidoahng pwa joh emen en mwamwahlki koawoa.