3
Mwoakid in Joauloang
1 Kasmanki armaj kan ma koah kohwahki irai en rong arai koaun kan apel joumaj kan; irai en peikkoang apel onopdahng kapwaihahda joang ohroj ma mwehu.
2 Padahkihoang irai en joah koauwe emen, a irai en kin moaloailoai apel kadek, pel anjoau ohroj irai en kajalehda mwomw mwehu oang armaj ohroj.
3 Pwa mijkoalkoalwa pein kisai pwen pweipwei, japeik, apel japwung. Kisai lidu in inoang nauna apel joangoan peren mwahl ohroj. Kisai pel anki inoangin koauwehla armaj apel pihrin; armaj kin lioassoang kisai, a kisai pel lioassoang irai.
4 A anjoauwo ma Koahs asai Jounkoamoaur kajalehda Ah kalahngan apel limpoak oang armaj kan,
5 Ih ne kamourihla kisai, jaudi pwa jang in doadoahk mwehu oau ma kisai pein wiahda, a pwen jang in pein Ah kadek. Ih kamourihkihla kisai, jang in ipwjapahl apel mour kapw ma Ngen Joaroawi kioang kisai, kamwkelehda kisai.
6 Koahs kin widekihoang Ngen Joaroawi pohn kisai inenin koalik jang ipen Jesus Christ asai Jounkoamoaur,
7 pwa jangin Ah kalahngan, kisai en kak pwungla ipen Koahs, pel oaloahdi mourro ma joh imwin ma kisai ohroj kajkajik.
8 Me sikesik mehlelpas.
Ngoah nimen kangoangehki koawoa mehpwiai pwa irai ma pwojon Koahs en injinohki mweidoahng arai anjoau en wia doadoahk mwehu, ma mwehu apel kaspoa oang armaj ohroj.
9 A kalke jang koawoa akpwung mwahl kan, apel iroak roairoai in peneinei kan, akmai kan, apel uhkihpene Kojonneddo. Johpwa kaspoan mehpwiai.
10 Poanoauwi armaj ma kin kahrehda jaminmin pehn oau; a mwerin poanoau kariau, doari ken pijekjang.
11 Koah kidal pwa joangoan armaj pwiok inenin nauna; diparai ok kadehde pwa irai pwen japwung.
Koarjoahklahn Poanoau kan
12 Anjoauwo ngoah kadarwe Artemas ke Tychicus ipoamw, wia uhwen oamw kak ohroj koah en indoa ipoai nehn Nicopolis pwa ngoah ne koajoanehdi pwa ngoah pirin mine wijahu nehn anjoau in kopou.
13 Pel wia oamw kak oang jeuweje Zenas, jounkawoahwoa kojonned, apel Apollos, pwa ira en kasapiahda ara jeiloak kan. Pel soahk pwa joang ohroj ira anahne en mine.
14 Riasai joauloang kan anahne kidalla doadoahkki arai anjoau oang doadoahk mwehu, pwa en kahrehng irai en jeuweje anahn mehlel kan; irai koanoahng joah mourki mour joh kaspoa.
15 Irai ohroj ma minmine ipoai pel kadarwehng koawoa arai rahnmwahu. Kioang amai rahnmwahu oang riasai joauloang kan.
Mahk kalahngan en Koahs en pel pwilpwili kamwai ohroj.