Nihn Paul Kijilikoau oang
Titus
Oarlap in Kijilikoau oauwe
Titus mihn likin men ma pwili wiahla joauloang. Ih wiahla ioangoan Paul sohndoadoahk apel jounjauwaj nehn en Paul doadoahk in kalohkjili.Nihn Paul kijilikoau oang Titus koadoaddoarlahng nah jounjauwaj pwulopwul men nehn Crete wijahu ma Paul koajoanehdi Titus en onohn pwa ih en jeuweje soahk doadoahk in mwomwohdjo. Kijilikoau oauwe kajalehda iroa kajampwal jiluh.
Keiou: Titus en saman joangoan siahk mwehu ma koaun in mwomwohdjo kan koanoahng anki; a in mehlel, kapang karjahng siahk nauna in dirin mihn Crete. Kariau: Titus ne poanoaula oang mwomwen ah en padahk oang joangoan pwihn nehn mwomwohdjohu, irai woal mah kan, irai li mah kan (ma pirin wud padahk oang li pwulopwul kan), irai woal pwulopwul kan, apel irai lidu kan.
Kaimwjekla: Paul pel kaweidki Titus doahroar mourin joauloang, a mehlel doahr kajampwalin popohl apel moaloailoai, doahr johla lioassoang armaj, akmai, apel jaminmin nehn pwungen sohn mwomwohdjo.
Audoapoan Kijilikoau
Sapin kijilikoau 1:1-4
Jounkaweidin mwomwohdjo 1:5-16
Pwukoahn joangoan pwihn kan nehn mwomwohdjo 2:1-15
Sikesik in kangoange apel poanoau pwi 3:1-11
Kadoariheklahn kijilikoau 3:12-15
1
1 Jang Paul, lidu in Koahs apel wahnpoaroan in Jesus Christ. Ngoah ne pilpilda apel koadoaddoardo pwa ngoah en jeuweje pwojon in nihn Koahs armaj pilpil kan, apel kahlwa irai oang me mehlello, ma ne kin padahkjili jang nehn mour joaroawi,
2 ma poahjoankihda koapwoarpwoar in mour joahsuk. Koahs, ma johkin likamw, ne inoaukihoang kisai mour oauwe mwohn sapin kawa
3 apel nehn anjoau ma koanoahng, Ih pel kajalehda nehn Ah padahk. Ih ne pel likihoang ngoahi Ah padahk oauwe; ngoah kalohkihjili jang ruwoj in Koahs, asai Jounkoamoaur.
4 Ngoah insinngoang koawoa, Titus, noai jermwein mehlel nehn pwojon ma kisa ankihpene.
Kalahngan apel popohl jang Jamasai Koahs apel Koaun Jesus Christ asai Jounkoamoaur oang koawoa.
En Titus Doadoahk nehn Crete
5 Ngoah kihdi koawoa nehn Crete pwa koah en koajoanehdi joang ohroj ma pwen anahne en wiawi; koah en pel pilda ihr mah kan nehn mwomwohdjo en kaweid nehn kahnihmw ohroj. Saman oai poanoaukan:
6 Jounkaweid men anahne en joh ah japwung; ih anahne painki lihmennoar, apel nah jerihkan anahne pwojon Koahs apel joah wia siahk nauna ke japeik.
7 Jangin in jounkaweid in mwomwohdjo men pwukoahki en Koahs doadoahk, koanoahng ih en joh ah japwung. Ih anahne en joah aklaplap, ke nimen lioas, ke lemei, ke noaroak in mwani, ke wia armaj perenki jakau men.
8 Ih pirin kin kajamwo armaj ohroj, apel pwungki me ohroj ma mwehu. Ih uhdahn pirin kak koaunda pein ih, pwung, joaroawi, apel kanaihoang pein Ih.
9 Ih anahne kolkol soangsoang padahkko, ma armaj kak liki, apel ma pahrekkoang padahk mehlello. Nehn joangoan mwommwoauwe ih nen kak kasihkeiki armaj joah lipilpil padahk mehlel, apel kajalehda japwungin irai kan ma kin uhwoang padahkkoauwe.
10 Pwa mine armaj dir ma kin pallanda apel kapweipweiki epwi armaj lal joh kaspoa, a in mehlel irai kan ma ne joauloangla, jang loapin lamlam in mihn Jew kan.
11 Ma inenin koanoahng koawoa en kauhdi arai lallal kan, pwa irai kin kapingihda kainek kan ki arai padahk japwung kan, jangin kahrpoa kamehk in wiahda mwani.
12 Pein mihn Crete men, kijehn irai joukohppok, ma sikoa sikesik mehlel pas, ma pwa mihn Crete kin likamw, irai doahr mahn naunahkan, irai kin dangahnga apel peihio.
13 Doari, sikesik mehlelpas me, ioar kahrehda koah uhdahn poanoauwi irai sihkei en anki pwojon
14 apel uhdihjang arai koapwoarpwoarki inoang in mihn Jew kan, apel en armaj kojonned kan ma kin injang ipen iraihok ma ne kerpwihla me mehlello.
15 Joang ohroj mwakelkel oang iraihok ma mwakelkel, a johpwa mehkij pirin mwakelkel oang irai kan ma jamin apel joah pwojon, arai lamlam apel mohngiong kan ne jaminla.
16 Irai sikoahjili pwa irai kidal Koahs, a arai wihwia johpwa doahroar da irai kin sikoa. Irai kin lioassoang armaj, japeik, apel joah warroang wia mehkij mwehu.