4
1 Mwohn Koahs apel Christ Jesus, ma pirin kadeik irai ma mohmour apel mehdi kan, apel jangin Ah pirin japahldo pwa ih en koaun doahr Nahmwarki men, ngoah ngoangki poaki koawoa:
2 en kalohkihjili Mahjanno, ngihsehse in kalohkihwe (mihndahr ma anjoau pwung ke joah), en kawikla, koapwungla, apel kangoange, nehn oamw padpadahk nehn kanangmah.
3 Mine anjoau oau pirin leldo ma armaj kan johla nimen rong padahk mehlel, a irai pirin wiahda pein injenarai; apel irai pirin pilda oang pein irai jounpadahk dir ma pirin kin pwehng irai joang kan ma irai nimen rong.
4 Irai pirin jipwoaljang nehn arai rong me mehlello, apel mweidoahng arai anjoau inoang mwahl kan.
5 A koah anahne kolkol oamw koaunda pein koawoa nehn irair ohroj; kanangmahioang loklok, wia doadoahk in sohn kalohki Rongmwehuwo, apel wia oamw pwukoa unjek doahroar jounpapah in Koahs men.
6 A ngoah, awahn oai pirin meiroangla ne leldo, apel anjoauwa ma ngoah pirin injang mour oauwe ne pel leldo.
7 Ngoah ne wia uhwen oai kak nehn mour oauwe, ma doahroar weir oau, ngoah ne koarjoahla weir oauwe, a ngoah pel kolkolloar pwojonno.
8 Doari, anjoau kije mwarmwar in kalwehdi joujowi ngoahi ki oai ne pwungla ipen Koahs, ma ioar Koaunno, Jounkoapwung, pirin kioang ngoahi Rehnno; ah jaudi oang ngoahi oar doari, ah pel oang ohroj ma kin joujowi Ih ki limpoak Ah pirin japahldo.
En Paul Poanoau kan
9 Wia uhwen oamw kak en indoa ipoai anjoau karwaro.
10 Jangin ah inenin ipwilki jampahioauwe apkas, Demas ne kerpwihla ngoahi, inlahng Thessalonica.
Crescens ne inla Galatia, a Titus ne inla Dalmatia.
11 Apkas Luke oar doari mine ipoai. Ukda Mark en pwili koawoa indoa, pwa ih kak jeuweje ngoahi nehn doadoahk oauwe.
12 Ngoah ne kadarla Tychicus Ephesus.
13 Doari, nehn anjoauwo ma koah pirin indoa, koah wahdo oai joakiddo ma ngoah kihdi ipen Carpus nehn Troas, apel pwilihkihla pukkok, a keiou kajampwal koawoa en wahdo pukkok ma wiawihkihda kilin jihpw.
14 Alexander, sohn wia pahranngo, inenin ne koauwehla ngoahi; a Koaunno pirin koalkoahki ih ah wihwiahu.
15 Kanaihoang koawoa jang ih pwa ih pwanah sihkeiki ah uhwoang asai padahkko.
16 Joh emen pwilihla ngoahi nehn anjoauwo ma ngoah sapin doaroa pein ngoahi; pwa irai ohroj ne kerpwihla ngoahi. Doari, Koahs en johpwa kapwukoahki irai me!
17 A Koaunno pwen minmine ipoai apel kasihkeii ngoahi, ioar kahrehda ngoahi ken kak kalohkihjili padahk unjekko oang mihn likin ohroj en rong; a ngoah ne pisjang nehn oawoan laian.
18 Doari, Koaunno pirin kapisla ngoahi jang joangoan nauna ohroj, apel wahla ngoahi nehn Ah Wein nehnloanngehu. Klohri en aluhwoang Ih jang apkas apel allaluhla! Amen.
Kaimwjeklahn Rahnmwahu
19 Doari, ngoahi kadar oai rahnmwahu oang Priscilla apel Aquila, apel peneinei en Onesiphorus.
20 Erastus minminehr Corinth: a Trophimus ngoahi kihdi nehn Miletus pwa ih johmwehuda.
21 Wia uhwen oamw kak pwa koah en leldo mwohn anjoau in kopou.
Eubulus, Pudens, Linus apel Claudia pel pwilihkihla joauloang kan ohroj kadarwe arai rahnmwahu.
22 Koaunno en pwilpwili ngenimwen.
Kalahngan en Koahs en pwilpwili kamwai ohroj.