3
Koarjoahklahn Rehn kan
1 Saman pwa pirin mine anjoau apwal nehn koarjoahklahn rehn kan.
2 Armaj pirin joamwoas, noaroak, juwei, apel lehmwsik; irai pirin lallal kainjinjuwed apel japeik oang jamarai apel inarai kan; irai johkin kapingkalahngan apel johkin poadidi oang joaroawi.
3 Irai pirin joampoak, johpwa mahk, karaun likamw apel lemei; irai pirin lioassoang me mwehu;
4 irai pirin pangla pwiliharai kan, irai pirin jerkeileng, apel lehmwsik, irai pirin ipwilki arai injenmwahu jang ipwilki Koahs;
5 Irai pirin likjanjalki arai mour joaroawi, a kia oaloahda manman mehlello. Kasohrohrjang koawoa joangoan armaj pwiai.
6 Epwi irai kin dilloang nehn umwen armaj apel koaunda li ma kin soausoaukihla diparai apel kin mweidoahng joangoan inoang ohroj en koaunda irai.
7 Li kan ma kin jongjong irai en padahkihdi mehkij, a irai johkak dehdehkihla me mehlello.
8 Doahr Jannes apel Jambres ara pallanda Moses, ioar pel doahr woal pwiai kin pallanda me mehlello — armaj pwiai arai lamlam ne johla doadoahk mwehu, apel johkak pwoaida nehn arai pwojon.
9 A arai doadoahk jehpirin pwoaida, pwa armaj ohroj pirin kapang uhwen arai pweipwei doahroar da ma wiawihoang Jannes apel Jambres.
Koarjoahklahn Padahk
10 A koah ne kauj oai padahk, oai wihwia, apel kahrpoan oai mour, oai pwojon, oai kanangmah, oai ipwil, apel oai kin enngengdehn nehn anjoau apwal kan,
11 oai koaloklok kan, apel oai apwal kan. Koah kidal joang ohroj ma lelloang ngoahi nehn Antioch, Iconium, apel Lystra, koaloklok apwal ma ngoah ne oaloa! A Koaunno kapisjang ngoahi joang pwiai ohroj.
12 Armaj ohroj ma nimen anki mour joaroawi nehn ahr pirin minmin oang Christ Jesus, irai pirin oaloa koaloklok.
13 A armaj nauna apel likamw kan pirin enngengdehnwe jang in me nauna oang me inenin nauna; irai pirin kapwkapweipweioar armaj kan, a irai pirin pel kapweipweiekdi.
14 A koah en enngengdehn oang me mehlello ma koah ne padahkihdi apel da ma koah uhdahn kamehlele. Pein koah kidal pwa inje oamw jounpadahk.
15 Koah pel kidal pwa jang nehn oamw jeri siksik, koah pel kin kidal Puk Joaroawi, ma kak kioang koawoa erpis ma kak kahlwahlahng koawoa koamoaur jang in oamw pwojon Christ Jesus.
16 Pwa audoapoan Puk Joaroawi unjek injang ipen Koahs, pel kajampwal oang padahkihoang armaj kan me mehlello, koapwungla japwung kan, oang poanoau in siahk pwung,
17 oang armaj men ma papah Koahs en kak wia apel koahiokla nehn joangoan wihwia mwehu ohroj.