2
Nihn Christ Jesus Jounpei Loalpwoas men
1 A oang koah, noai jermwein, koah en sihkei jangin kalahnganno ma kisai ankihpene nehn asai oauwoang Christ Jesus.
2 Oaloa padahk kan ma koah ne rong ngoahi kalohki nehn pwungen jounkadehde dir, koah likihoang padahk kan oang irai armaj lelpoak kan pwa irai en pel kak padahk oang armaj sohrohr.
3 Doari, oaloa oamw pwaij nehn loklok, doahroar jounpei loalpwoasin Christ Jesus men.
4 Jounpei men ma kin pwahsies nehn ah doadoahk kin nimen kadeke ah koaun, apel johkin pingkihda wihwiahn irai kan ma jaudi jounpei.
5 Jounweir men ma kin kijou nehn weir johkak koldi kijakijjo, ioarroar ma ih peikkoang kojonned kan.
6 Jounmwoaswel men ma kin doadoahk koalik uhdahn oaloa wah oh mijoa nehn anjoau in doddol.
7 En lemleme mehpwiai ma ngoah siksikoa, pwa Koaunno pirin mweidoahng koawoa pwa koah en kak woahwoahki joangpwiai ohroj.
8 Samsaman Jesus Christ, ma ne iejda jang mehdi, ma kijehn kadaudokin David, ma ioar ne padpadahk nehn Rongmwehuwo ma ngoah kin kalohki.
9 Jangin oai kalohki Rongmwehuwo, ngoah koaloklok apel joalkihdi jihn doahroar armaj wiahda japwung koalik. A Mahjan en Koahs pwen johpwa jihndi,
10 A doari, ngoah kanangmah oaloahda joang ohroj in oadoan nihn Koahs armaj pilpilda, pwa irai en pwili oaloa koamoaurro ma indoa jang Christ Jesus apel wahdo klohri poaspoas.
11 Me ioar sikesik mehlelpas:
“Ma kisai pwili Christ mehdi,
kisai pel koanoahng mour Ipoa.
12 Ma kisai pirin nansihoang kanangmah nehn me ohroj,
kisai koanoahng pwili Christ koaun.
Ma kisai kahmahmki Ih,
Ih pel pirin kahmahmki kisai.
13 Ma kisai johpwa loalpwoas,
Ih pwen joah uhdi loalpwoas,
pwa Ih johkak wia likamw oang pein Ih.”
Sohndoadoahk Kamanmanla men
14 Kasmanki nihmw armaj kan joanngoauwe, apel kioang irai koahkoahlik mehlel pwa mwohn Koahs irai en joah akmai, doadoahkki loapin lal ma joh kaspoa, a ioarroar koauwehla armaj kan ma rongrong.
15 Wia oamw keiou mwehu pwa koah en oaloahdi kamanman unjek mwohn Koahs, doahroar sohndoadoahk men ma johpwa mehkki ah doadoahk, ma kin pwung ah padahkki padahk in en Koahs mehlello.
16 Joah koaroannoang sikesik joah joaroawi apel pweipwei, ma ioar kin kadohla armaj jang Koahs.
17 Joangoan padahk pwiai doahroar ohla mour oau ma kin kangkangkangla uduk. Woal roahmen, Hymenaeus apel Philetus, ioar ma kin padpadahkki joang pwiai.
18 Ira ne wudjang nehn al in me mehlello apel kapkapingi pwojon in epwi joauloang jangin ira siksikoa pwa asai iejda ne wiawihla.
19 A poahjoan soang ma Koahs ne koajoanehdi johkak mwoakidda, apel Mahjan pwiai ne pel insingdi puwoa: “Koaunno kidal irai kan ma Nah,” apel, “Armaj men ma kin siksikoa pwa ih nihn Koaunno uhdahn pirin pwurjang wihwia nauna kan.”
20 Nehn umw koalik oau, pahn apel pwohl in mwinge dir mine loaloa: epwi wiawihkihda silper apel kohl, a epwi jang suhkoa ke pwirej; epwi oang doadoahk in rehn ohroj, a epwi oang doadoahk kajampwalloar doari.
21 Ma emen kamwkelehda pein ih jang joang nauna pwiai ohroj, ih pirin doadoahk oang in kahrpoa kajampwal kan, pwa ih ne kajarwihla pein ih oang doadoahk in Koaunno, a ih ne pel onopdahng doadoahk mwehu ohroj.
22 Joah wia inoang in pwulopwul kan, a nansihoang koadoahkoa me pwung, pwojon, limpoak, apel popohl; pasoahng irai kan ma anki mohngiong mwakelkel poangpoanglahng Koaunno en jauwaj.
23 A kalkehjang koawoa akmai pweipwei apel jawoahwoa kan, pwa koah kidal pwa me kin imwkihla akmaihoar doari.
24 Sohn papah Koaunno men, koah koanoahng joah akmai. Koah anahne kadek oang ohroj, wia jounpadahk mwehu apel kanangmah men,
25 ma kin moaloailoai nehn oamw koapwung oamw imwinsihsi kan, pwa nen kak oar Koahs pirin kioang irai anjoau mwehu in koaluhla apel kidalla me mehlello.
26 Doari, irai pirin poahmda pein irai apel kaujang lidipin Jehsen, ma ne jipoardi irai apel wiahng irai en peikkoang ah koajoandi kan.