Nihn Paul Kijilikoau Kariau oang
Timothy
Oarlap in Kijilikoau Oauwe
Nihn Paul kijilikoau kariau oang Timothy audohdkihda koalik in wa kaweid oang pein Timothy, nehn a wia ioange sohnpadahk pwulopwul apel sohn jauwaj men. Audoapoan oarlap in kijilikoau oauwe ioar kanangmah. Timothy oaloa kaweid apel kangoang en kolkol ah wia jounkadehde loalpwoas men in Jesus Christ, en kolkol padahk mehlel in Rongmwehuwo apel Kadehde Mering, apel en wia ah pwukoa in jounpadahk apel sohn kalohki Rongmwehu, nehn apwal apel uhwoang.
Timothy oaloa kangoang in soahk kanaihoang oar ih pasoahng “akmai pweipwei apel jawoahwoa kan” ma wia nauna, a ioar koauwehla armaj kan ma rongrong akmai pwiai.
Nehn joang pwiai ohroj, Paul kasmanki Timothy karajraj in ah mour apel kahrpoa — ah pwojon, kanangmah, limpoak, enngengdehn, apel apwal nehn koaloklok.
Audoapoan Kijilikoau
Sapin Kijilikoau 1:1-2
Kaping apel Kangoang 1:3—2:13
Kaweid apel Kaperki 2:14—4:5
Pein en Paul irair 4:6-18
Koarjoahklahn kijilikoau 4:19-22
1
1 Jang Paul, wahnpoaroan in Christ Jesus men jangin kupwuren Koahs, koadoaddoardo en kalohki mourro Koahs inoauki kisai en oaukihpene ipen Christ Jesus —
2 Oang Timothy, noai jermwein kajampwal:
Kalahngan, mahk apel popohl jang Jamasai Koahs apel asai Koaun Jesus Christ oang koawoa.
Kajpahl kalahngan apel Kangoang
3 Ngoah kapingkalahngan oang Koahs ma ngoah kin papah in lamlam pwung, doahroar ma oai pahpa koalikkok ne wia. Ngoah kapingkalahngan oang Koahs in nehn oai samanda koawoa anjoau ohroj nehn oai kapkap kan inpwong apel inrehn.
4 Ngoah samanda pilen mijoammwen kan, apel ngoah nimen pwuroahng suhwoang koawoa, pwa ngoah en dirkihla peren.
5 Ngoah samsaman pwojon mehlel ma koah anki, joangoan pwojon ma oamw nohno koalik Lois apel oamw nohno Eunice ne pel anki. Ngoah koapwoarpwoarki pwa koah pel anki pwojonnohr.
6 Ki kahrpoahioauwe, ngoah kasmanki koawoa en kamouri kijakijjo ma Koahs ne kioang koawoa anjoauwo ngoah kihdi poahioa kai pohmmwen.
7 Pwa Ngenno ma Koahs ne kioang kisai johkin wiahng kisai en jasihkei in lamlam; joah, pwa Ngenin Koahs kin audohkihda kisai manman, limpoak, apel kanangmah.
8 Johpwa mehkki oamw kadehde asai Koaunno; pel johpwa mehkki ngoahi, ma wia kalpwuhj men in oadoan Christ. A ioar koanoahng, wia oamw pwaij in loklokki Rongmwehuwo, doahroar en Koahs kioang koawoa sihkei oang loklok oauwe.
9 Koahs ne koamoaurla kisai apel pangin kisai oang mour joaroawi, jaudi pwa jangin da kisai ne wiahda, a pwa jangin pein Ah kahrpoa apel kalahngan. Ih kioang kisai kalahngan oauwe jangin oadoan Christ Jesus mwohn sapin kawa,
10 a apkas ne janjal oang kisai jangin indoa in asai Jounkoamoaur, Christ Jesus. Ih ne iroahdi manmanno en mehdi apel jangin Rongmwehuwo, ne kajalehda mour poaspoas.
11 Koahs ne pilda ngoahi en wia wahnpoaroan apel jounpadahk men en kalohki Rongmwehuwo,
12 apel ioar kahrpoahioauwe ngoah loklokki mehpwiai. A ngoah pwen anki koapwoarpwoar unjek, pwa ngoah kidal Inje ma ngoah kin liki, apel ngoah koapwoarpwoar pwa Ih kak jiloa da ma Ih ne likihoang ngoahi oaroh lel Rehnno.
13 Kolkol soangsoangdi oang Mahjan mehlel kan ma ngoah ne padahkihoang koawoa, en wia oamw mihn kaweid koawoa en kahlmoangi. Minmine nehn pwojonno apel limpoakko ma kisai ne ankihla nehn asai oauwoang Christ Jesus.
14 Jangin manman in Ngen Joaroawi, ma mohmour nehn kisai, jiloa joang mwehu kan ma Ih ne likihoang koawoa.
15 Koah kidal pwa ohroj nehn wein Asia, pasoahng Phygelus apel Hermogenes, ne kerpwihla ngoahi.
16 Mweidoahng Koaunno en kupwurkalahngan oang peneinei in Onesiphorus, ki ah kin kaperenihda ngoahi pak dir. Ih johpwa mehkki pwa ngoah minmine nehn kalpwuhj,
17 a anjoauwohr ih lel nehn Rome, ih sapda rapahki ngoahi oaroh ih kapangda ngoahi.
18 Mweidoahng Koaunno en kupwurkalahngan oang ih nehn Rehnno. A koah inenin woahwoahki ia woahr ih wiahng ngoahi nehn Ephesus.