6
1 Irai kan ma lidu anahne wia pwa arai koaun kan warroang wahu ohroj, pwa en joh emen en lahlahwe oadoan Koahs apel asai padahk.
2 Liduhkan ma anki koaun ma joauloang anahne joah mwamwahlki arai koaun kan, pwa irai pel joauloang pwi. A lidu kan koanoahng papah arai koaun kan mwehu pwa irai ne injenmwahuki arai doadoahk pwa irai pel joauloang pwi ma irai ipwilki.
Padahk Likamw apel Pai Mehlel
Doari koah uhdahn pirin padahkihoang apel poanoauwihki irai mehpwiai.
3 Armaj joah lipilpil ma padahk oaujoang jang padahk mehlello apel johpwa pwung oang Mahjan mehlel in asai Koaun Jesus Christ apel padahk in Koahs,
4 ne dirkihla aklaplap apel joh mehkij ih kidal. Ih anki inoang joah mwehu oau in akpwung apel akmai ki lal kan ma kin kahrehda luwak, pingping, koauwehk, lemlemehk nauna,
5 apel akmai johkin uhdi jang ipen armaj ma ahr lamlam johla doadoahk, irai pel johla anki me mehlello. Irai kin lemlemleme pwa mour joaroawi, ioar pel oau al ma irai pirin koapwoahpwoahkihla.
6 A mour joaroawi kin inenin kakoapwoahpwoahihla armaj, ma irai isarki joang kan ma irai ne anki.
7 Dahkij kisai wahdohng nehn jampahioauwe? Joh! A dahkij kisai pirin wahjang nehn jampahioauwe? Joh!
8 Doari, ma ne mine kanasai mwinge apel asai likkoau, mehpwiai ne pwen isar oang kisai.
9 A irai kan ma kin nimen koapwoahpwoahla kin kalap kippoang nehn jongjong apel lohdihoang nehn lidip inoang pweipwei apel keper dir, ma kin koauwehla pein irai.
10 Pwa limpoak oang mwani ioar oau poahjoan in joangoan nauna ohroj. Epwi armaj inenin ngoangkihla irai en nainki mwani, doari, irai ken inla dohlahjang pwojonno apel koauwehkihla arai mohngiong kan ki joangoan pahsoau dihrdir.
Poanoau Sohrohr oang Koawoa
11 A koah, woalin Koahs men, kalkehjang koawoa joangpwiai ohroj. Nansihoang audohdkihda pwung, mour joaroawi, pwojon, limpoak, kanangmahioang apwal, kadek.
12 Kijouwe nehn oamw kak nehn weirin pwojon, apel kalwehdi oang koawoa mour poaspoas, pwa ioar mour oauwe ma Koahs pangin oang koawoa nehn oamw ne wiahda kadehde mwehu in pwojon mwohn jounkadehde dihrdir.
13 Doari mwohn Koahs, ma kioang joang ohroj arai mour, apel mwohn Jesus Christ, kadehde soangsoang Ah pwojon mwohn Pontius Pilate, ngoah ruwoje koawoa:
14 en peikkoang oamw koajoandi kan apel kolkol loalpwoas koajoandi kan oaroh lel Rehnno ma asai Koaun Jesus Christ pirin japahldo.
15 En Jesus pirin japahldo pirin wiawi anjoauwo ma koajoandi jang Koahs, ma ioar kalahpwuk Koaun kapai, Nahmwarki in nahmwarki kan, apel Koaun in koaun kan.
16 Ih kalahpwuk ma johkak mehdi; Ih kin mine nehn marammo ma joh emen kak koaroannoang. Joh emen armaj ne kapangla Ih; joh emen armaj nen kak kapang Ih. Oang Ih ioar en aluhwoang wahu apel manman poaspoas! Amen.
17 Ruwoje irai kan ma koapwoahpwoahki koapwoahn mour oauwe en joah aklaplap; a irai en koapwoarpwoarki, jaudi joang joah dehde oau doahr koapwoahpwoa. A irai en koapwoarpwoarki Koahs, ma japankihoang kisai joang ohroj kisai en injenmwahuki.
18 Ruwoje irai en wia mwehu, irai en koapwoahpwoahki doadoahk mwehu, irai en japan apel onopdahng oauwoang armaj.
19 Nehn mwomw oauwe, irai pirin koaunopdahng pein irai koapwoa kajampwal oau ma pirin wia poahjoan sihkei oau oang anjoau kan ma pirin indoa. Anjoauwo, irai nen kak oaloahdi mourro ma ioar mour mehlel.
20 Timothy, kol kanaihoang da ma ne liklik oang koawoa en apwali. Joah wia sikesik jamin apel akmai pweipwei kan ma epwi armaj kin wiahki pwa ioar “loalkoang.”
21 Pwa epwi kin kamehlele pwa irai anki loalkoang oauwe; imwlahn joangoan kamehlel oauwe, irai ne jehjoahla alin pwojon.
En Koahs kalahngan en mine ipamwai.