5
Pwukoa kan pid Joauloang kan
1 Johpwa koapwung woal mah men, a wiahng ih doahroar ma ih ioar oamw pahpa. Wiahki mwahnkapw kan rioamw.
2 Wiahki li mah kan inoamw, apel peinkapw kan rioamw jerpein, in siahk pwung ohroj.
3 Woaunki liohdi kan ma kalkalahpwuk.
4 A ma liohdi men mine nah jeri, ke nihn nah jerihkan, irai uhdahn pirin kapwaihahda mijkoalkoal arai pwukoahn doadoahk oang arai peneinei, pwa ioar doahroar irai pirin dupukkoang jamarai apel inarai kan, ke arai mwahmwa apel nohno koalik kan, pwa me ioar joangkoa Koahs kin perenki.
5 Liohdi men ma kalkalahpwuk, ma joh nah jeri en apwali ih, kin koapwoarpwoarki Koahs; ih kin poaden kapkap apel poaki Koahs en jeuweje ih inpwong apel inrehn.
6 A liohdihmen ma kin mweidoahng palwoaroa oang peren mwahl, ih ne mehdi, mihndahr ma ih pwen mour.
7 Kioang irai kaweid pwiai pwa joh emen en kadeik irai.
8 A ma mine armaj johkin apwali kijeh kan, a mehlel iraihok ma uhdahn kijehn pein ah peneinei, irai ne kahmahmkihla ahr pwojon; irai pel naunahjang iraihok ma joah pwojon.
9 Koah en joah kapsahng emen liohdi oang nehn iroakdihn oadoan liohdi kan ma ih pe kahjik lel johnpar weneijek. Pel oau, ih uhdahn pirin pwoapwoaud pehn oauwoar,
10 apel admwehuki ah wihwia mwehu: a lihmen ma apwalihda nah jeri kan inenin mwehu, kajamwohng sohn keiru kan nehn umwahu, ma kin amwun ehn nihn Koahs armaj kan, ma kin jeuweje armaj kan nehn ahr apwal kan, apel poadidi oang wihwia doadoahk mwehu.
11 Koah en joah kapsahng oadoan liohdi pwulopwul kan oang nehn iroakdihn oadoan lohdi kan, pwa nehn anjoau ma irai nen inoangihda pwoapwoaud, irai kin pwurjang Christ,
12 apel dipkihda arai koauwehla arai inoau in mehjjo oang Ih.
13 Irai pel kidalla mwamwahlki arai anjoau injang oau umw inlahng oau umw; a nauna jang me, irai wiahla sohn lipahned apel kadroapwoa armaj, siksikoa joang kan ma irai joah koanoahng sikoa.
14 Doari, ngoah kaweidki liohdi pwulopwul kan en pwoapwoaudla, nainki jeri, apel apwali umwarai kan, pwa irai en joah mweidoahng anjoau mwehu asai imwinsihsi kan en kin koauwe kisai.
15 Pwa epwi liohdi ne kerpwihla arai pwojon apel idawenla Jehsen.
16 A ma mine liohdi nehn en li joauloang men ah peneinei, liho anahne apwali liohdi kan a joah kasoausoauwihki mwomwohdjo, pwa mwomwohdjo en kak pwen apwali liohdi kan ma kalkalahpwuk.
17 Anahne soahk ma irai koaun kan ma wia ahr doadoahk mwehu koanoahng oaloa wahu pak riau koalik, a in mehlel, irai ma doadoahk koalik kapkapahrak apel padpadahk.
18 Pwa Puk Joaroawi pwa, “Joah piroahpene oawoan kahu woal men nehn anjoauwo ma kamwai doadoahkki en kamwisihdi wehn wihd kan,” apel “Sohndoadoahk kan kin koanoahng oaloa dupkoan ahr doadoahk.”
19 Joah rong kadip oau ma uhwoang koaun in mwomwohdjo men ma joh jounkadehde roahmen ke jilmen pwilihdo kadippo.
20 Koapwungla in janjal irai ohroj ma kin wiahda dihp, pwa armaj sohrohr kan en pel mijik.
21 Mine ipen Koahs, Christ Jesus apel sohnloang joarwihkan, in wahu ngoahi pangin koawoa en kapwaihahda kaweid pwiai nehn joh liaksohrohr ke kadek sohrohr oang joah lipilpil nehn mehkan koah wia.
22 Moaloailoai, joah pispisinnoar kihda poahmmwen pohn armaj en kajarwihla irai oang doadoahk in Koaunno. Joah pwili pid oang nehn dipen epwi armaj; pein koah en mwakelkel.
23 Joah nim pil oar doari, a nim ekij wain pwa en jeuweje kamwisihdi mwinge en mwehu oang palwar, pwa koah kin kalap johmwehu.
24 Dipen epwi armaj kin janjal armaj en kapang, apel diparaihok inla mwohrai oang kadeik; a dipen epwi armaj kin kapangekda mwuhr.
25 Nehn mwommwoauwe doadoahk mwehu kan kin janjal armaj en kapang, a doadoahk mwehu kan ma johpwa janjal apkas johkak oakkoakla.