4
Jounpadahk Likamw kan
1 Ngenno pwa, in janjal, pwa epwi armaj pirin kerpwihla pwojonno nehn anjoau kan mwuhr; irai pirin peik oang ngen likamw kan apel pwilihla padahk in ngen jaus kan.
2 Joangoan padahk pwiai kin kalohkjili jang widing in armaj likamw kan, ma arai lamlam ne mehdi, doahroar ma pwen koaroangroangki ain pwideng.
3 Joangoan armaj pwiai kin padahkihwe pwa pwoapwoaud mehkij ma japwung, apel kang joangoan mwingehpwi pel japwung. A Koahs ma kapikda mwingehpwiai pwa armaj pwojon kan ma ne marainkihla me mehlello en kang mwerin arai kapkap in kaping.
4 Joang ohroj ma Koahs kapikda, inenin mwehu; pel johpwa mehkij kisai pirin joikla; a joang ohroj kisai pirin oaloa in kapkap in kaping,
5 pwa Mahjanin Koahs apel kapkap kin kahrehda en Koahs ah pirin kupwurki joangpwiai.
En Christ Jesus Jounpapah Mwehu men
6 Ma koah poanoauwihki rioamw joauloang kan kaweid pwiai, koah nen wiahla jounpapah in Christ Jesus mwehu men, nehn oamw pein kamwingehki ngenimwen Mahjan in pwojon kan apel padahk mehlel ma koah kin kauj.
7 A kalkehjang koawoa inoang kan ma kin uhwoang Koahs, ma johpwa koanoahng armaj en siksikoa. Kaikaihahn pein koawoa oang mour joaroawi.
8 Kaihahn in palwar mine ekij kaspoa, a kaihahn in pali ngen ioar inenin kaspoa nehn joang ohroj, pwa ih inoaukihoang kisai mour apkas apel mwuhr.
9 Me sikesik mehlelpas, kisai en oaloa in unjek apel kamehlele.
10 Kisai loklok apel doadoahk koalik pwa kisai ne kioang asai koapwoarpwoar nehn Koahs mourro, ma ioar wia Jounkoamoaur in kisai ohroj, a in mehlel en irai ma kamehlele.
11 Kioang irai kaweid pwiai apel padahk pwiai.
12 Johpwa mweidoahng emen en mwamwahlki koawoa pwa koah pwulopwul, a koah en wia mihn kahlmoang oang irai kan ma pwojon, nehn oamw sikesik, nehn oamw siahk, in oamw limpoak, nehn oamw pwojon apel mwakelkel.
13 Oaroh lel anjoauwo ngoah japahlwe, nansihoang wadek Puk Joaroawi oang armaj mwohn pokon, apel nansihoang kapahrakjili apel padahkjili.
14 Koah en joah mwamwahlki kijakij in ngen ma mine ipoamw, ma ne liklikkoang koawoa anjoauwo ma joukohp kan lallal, a irai ma koaun kan kioang poahrai pohn koawoa.
15 Pwoarjek oang apel poadidi oang wihwia joang pwiai, pwa armaj ohroj en kak kapang oamw koakoairda.
16 Kanaihoang pein koawoa pwilihkihioar oamw padahk kan. Nansihoang wihwia joangpwiai, pwa ma koah wia, koah nen doaroahla pein koah apel irai kan ma kin rong koawoa.