3
Koaun kan nehn Mwomwohdjo
1 Sikesik mehlelpas me: Ma woal men injinohki en wia koaun in mwomwohdjo men, ih inoangi doadoahk inenin kajampwal oau.
2 Koaun in mwomwohdjo men anahne en joh ah japwung; koanoahng pahioa en emennoar li, apel kidal dahkij ma pein ih kin wihwia, koaunda injene, apel kidal koajoanehdi. Koaun mene anahne en kin kajamwo mihn likin kan oang nehn umwahu; apel koanoahng ih en kak padahk;
3 ih koanoahng wia woal men ma johkin koamoam jakau ke lemei, a ih pirin kadek apel moaloailoai, ih jehpirin ipwilki mwani.
4 Ih anahne en kak apwali mwehu pein ah peneinei apel wiahng nah jerihkan en peikkoang ih in wahu unjek.
5 Pwa ma armaj men jehjoa doahroar ah en apwali pein ah peneinei, a imdoahr ih en kak apwali mwomwohdjohn Koahs?
6 Ih anahne wia joauloang koahiok men nehn ah pwojon, pwa ih en joah lehmwsikda aklaplapla apel kadeikda, doahroar Jehsenno.
7 Ih koanoahng wia woal men ma armaj, jaudi sohn ahn mwomwohdjohu, pel woaunki, pwa ih en joah johla wahu in apel joah lelloang nehn en Jehsen lidip kan.
Jounkohwa kan nehn Mwomwohdjo
8 Jounkohwa in mwomwohdjo en pel uhdahn siahk mwehu apel mehlel; irai jehpirin nim wain koalik, ke pel noaroakin mwani;
9 in lamlam pwung, irai koanoahng kolkol mehlel in pwojonno ma ne janjal oang irai.
10 Poasoahkparai en wiawihla mijkoalkoal; ma irai pwoaida, mweidoahng irai en wia jounkohwa.
11 Lihkan pel anahne wia siahk mwehu apel joah lipahned; irai anahne lamlam mwakelkel apel kidal da irai kin wihwia, apel mehlel nehn me ohroj.
12 Emen jounkohwa in mwomwohdjo anahne painki li emennoar, apel en kak apwali mwehu nah jeri kan apel ah peneinei.
13 Irai kan ma kin wihwia doadoahk mwehu pirin kenkenla ipen armaj kan; irai pirin pel kak eimah nehn arai siksikoa doahroar arai pwojon Christ Jesus.
Irair Rir Koalikko
14 Nehn oai insingsingi kijilikoau kije oang koawoa, ngoah koapwoarpwoar pwa ngoah pirin lelwe apel suhwoang koawoa anjoau koaroan.
15 A ma ngoah kos, kijilikoau kije pirin jeuwejehki koawoa en kidal siahk ma koanoahng kisai en wia nehn Umwen Koahs, ma ioar mwomwohdjohn Koahs mourro, ma ioar wur apel poahjoan in me mehlello.
16 Johpwa emen nen kak kahmahmki kajampwalin irair ririn asai woaunki Koahs:
Koahs ne janjalda in mwomwen armaj,
Ngen Joaroawi pel kajalehda pwa Ih ioar pwung, apel sohnloang kan ne kapang Ih.
Rongin Koahs ne pel lohkjili nehn pwungen weikan,
armaj kan nehn jampah pel kamehlele Ih, apel Ih ne pwoakpwoakdahla nehnloannge.