2
Kaudek in Mwomwohdjo
1 Doari, mwohn me ohroj ngoah kangoangehki koawoa pwa anahn kan, kapkap kan, poakpoak kan, apel kaping kan en indahlahng Koahs oang armaj ohroj:
2 oang nahmwarki kan, apel armaj laplap kan ohroj, pwa kisai en kak mourki mour moaloailoai apel popohl nehn asai kin woaunki Koahs apel wia me mwehu.
3 Me ioar ma mwehu pwa kamalauihda Koahs, asai Jounkoamoaur,
4 ma kin mwehuki armaj ohroj en koamoaurla apel marainkihla me mehlello.
5 Pwa Koahs emennoar mine, apel emen pel mine ma kin koakonehpene Koahs apel armaj kan, ioar armajjo, Christ Jesus,
6 ma ne meiroangkihla pein Ih pwa en koapwungla dipen armaj ohroj. Nehn anjoauwo ma pwung, meiroang oauwo ioar kadehdehda pwa Koahs kupwurki armaj ohroj en koamoaurla,
7 pel ioar kahrpoahioauwe ma ngoah koadoaddoarkihdo in mwomwen wahnpoaroan apel jounpadahk in mihn likin kan, pwa ngoah en lohkihjili doahr Ah mahjanin pwojon apel mehlel. Ngoah johpwa siksikesik likamw, ngoah pwen sikesik mehlel!
8 Ngoah kin nimen woal ohroj wija ohroj en kapkap, woal poadidi kan, ma kak kouda poahraikan in kapkap a joah lioas ke akmai.
9 Ngoah pel nimen lihkan en woaun apel irai en likkoau mwehu apel koanoahng, jaudi irai en kalingihda pisen moangoarai in oau joangoan mwomw, ke kapwaski kohl ke pel sakai kajampwal kan, ke pel likkoau koalik dupkoa;
10 a pwen in wihwia mwehu in doahroar dahioau ma koanoahng li poadidi kan.
11 Lihkan en oaloa padahk nehn nennen apel aksiksik unjek.
12 Ngoah johpwa mweidoahng irai en padahk ke anki pwukoa pohnangin woal kan; lihkan anahne kolkol moaloailoai.
13 Pwa Adam ma kapikpikda mijkoalkoal; a mwerin, Eve.
14 Pwa pel jaudi Adam ma lohdihoang widing mijoa; a liho ma lohdi mijkoalkoal apel koauwehla en Koahs kojonned.
15 A li men pirin mourkihla nehn ah noaisikihdi jeri, ma ih poadidihoang pwojon, limpoak, apel mour joaroawi, pwilihkihla mour woaun.