Nihn Paul Kijilikoau Keiou oang
Timothy
Oarlap in Kijilikoau oauwe
Timothy, joauloang pwulopwul men jang Asia Siksik, ma ah nohno mihn Jew men a ah pahpa mihn Greek men. Timothy wiahla woaroak in Paul apel jauwajpoa nehn ah doadoahk in Rongmwehu. Nihn Paul kijilikoau keiou oang Timothy pid iroa inenin kajampwal jiluh.
Padahk oauwe, ma doaloahpene lamlam in mihn Jew apel mihn likin kan, ne poahjoankihda kamehlel oau pwa jampah juwed apel joh emen kak koamoaurla janngoar in maram kajampwal rir apel wihwia kan ma doahr kalikjang joangoan mwinge ke joah pwoapwoaud. Kijilikoauwe pel kihda kaweid kan pid apwali mwomwohdjo apel kaudek, pasoahng kawoahwoahpen joangoan siahk mwehu ma koaun in mwomwohdjo apel jounkohwa koanoahng anki. Kaimwjekla, Timothy ne oaloa kaweid in mwomwen ah en wia jounpapah mwehu in Jesus Christ men apel doahroar pwukoa kan ma ih anki oang joangjoangoan pwihnin joauloang kan.
Audoapoan Kijilikoau
Sapin kijilikoau 1:1-2
Kaweid kan ma pid mwomwohdjo apel sohndoadoahk kan 1:3—3:16
Kaweid kan oang Timothy doahroar ah doadoahk 4:1—6:21
1
1 Jang Paul, wahnpoaroan in Jesus Christ jang in iloak in Koahs asai Jounkoamoaur apel Jesus Christ asai koapwoarpwoar —
2 Oang Timothy, noai jermwein mehlel nehn pwojon:
Kalahngan, mahk apel popohl jang Jamasai Koahs apel asai Koaun Jesus Christ oang koawoa.
Koahkoahlik kan ma Uhwoang Padahk Likamw
3 Ngoah nimen koawoa en onohn Ephesus, ma ioar ngoah ne kangoangehki koawoa anjoauwo ngoah jeiloaklahng Macedonia. Epwi armaj men kin padpadahkki padahk likamw. Koah anahne ruwoj irai en uhdi.
4 Pwehng irai en uhdihjang inoang kan apel iroak in kadaudok roairoaihok ma kin ioarroar kahrehda akmai. Mehpwiai johpwa wia kijehn koajoandihn Koahs; a pwojon ioar kin kajalehda koajoandihn Koahs.
5 Kahrpoan padahk oauwe ioar en kajalehda limpoak ma kin injang in emen mohngiong mwakelkel, lamlam pwung, apel pwojon mehlel.
6 Mine epwi armaj ne pwurlahjang mehpwiai apel japwungkihla ahr sikoa me mwahl kan.
7 Irai kin nimen wiahla jounpadahk in kojonnedin Koahs, a irai johkin woahwoahki pein arai sikesik ke iroahkan ma irai kin eimah siksikoa.
8 Kisai kidal pwa Kojonneddo ioar mwehu ma armaj pwen doadoahkki in wioapoahu ma koanoahng.
9 In mehlel, koanoahng en kasman pwa kojonned kin wiawihda, jaudi oang armaj kan ma mwehu; a wiawihda oang irai ma kin koauwehla kojonned ke wiahda japwung koalik, irai kan ma joah pwojon Koahs apel dipan, irai kan ma johpwa poadidi ke joh ngenin Koahs iparai, irai kan ma kojukdi jamarai ke inarai ke sohn kojarmaj,
10 oang irai ma kin nenek, oang irai ma woal painki woal, irai ma kin pirap ke noaski armaj, kin likamw apel wia kadehde likamw ke wia joang joah lipilpil ma kin uhwoang koajoandi mwehu.
11 Padahkko ma janjal nehn Rongmwehuwo ioar ne wia oai pwukoahn pakairki pwa Rongmwehuwo jang Koahs ma ling apel kapai.
Kapingki Kalahngan en Koahs
12 Ngoah kajpahl kalahngan oang Christ Jesus asai Koaun, ma ne kioang ngoahi sihkei in wia oai pwukoa doadoahk. Ngoah kapinga Ih pwa Ih kajampwalki ngoahi apel pilda ngoahi en papah Ih,
13 mihndahr ma mehj ngoah kin lahlahwe Ih, kin kojkojuk apel mwamwahlki Ih. A Koahs pwanah kalahngan oang ngoahi nehn anjoauwo ngoah kahjik pwojonla kahrehng ngoahi en jehjoa da ngoah kin wihwia.
14 A asai Koaunno kamwroahdihoang pohioa Ah roakin kalahngan. Ih ne kioang ngoahi pwojon apel limpoak ma kisai ankihpene nehn asai oauwoang Christ Jesus.
15 Doari, me sikesik mehlelpas, pwa armaj en kajamwo apel kamehlele, nehn joh peikajal: Christ Jesus indoa jampah pwa en koamoaurla irai ma dipan kan. Ngoah ioar keiou nauna nehn pwungarai,
16 a Koahs ioar mahkoahng ngoahi, pwa Christ Jesus en kajalehda Ah kanangmah unjek, nehn Ah soahk ngoahi. Ngoah, ma keiou nauna nehn pwungen irai ma dipan kan, ioar ne wia karajraj oau oang ohroj irai ma pirin mwuhr pwojonla Christ apel oaloahda mour joahsuk.
17 Doari, oang Koahswahr doari, Nahmwarki poaspoas, ma johkak mehdi apel joah janjal—wahu apel klohri en aluhwoang jang apkas apel allaluhla! Amen.
18 Timothy, noai jeri, ngoah kapwukoahki koawoa kojonned oauwe, ma ioar doahroar Mahjanin kokohppok pid koawoa me ne janjalda mehjwa. Doadoahkki Mahjanin kokohppok doahroar dipwjoau in mahwin pwa koah en pei mwehu.
19 Koah en pel kol oamw pwojon apel lamlam pwung. Pwa mine armaj pwi ma johkin kapwaihahda lamlam pwung, doari ken kerpwihla arai pwojon.
20 Nehn pwungarai ioar Hymenaeus apel Alexander, ma ngoah ne koalkoa nehn oai mweidoahng ira pehn manmanin Jehsen pwa ira en kidalla doahroahr ara en uhdihjang lahlahwe Koahs.