3
Kapkapki Kamai
1 En kaimwjek, riamai kan, kamwai kapkapki kamai pwa en Koaunno Mahjan en joh uhdi apel pispisin lohkjili; a armaj en pel woaunki oaloahda, doahroar ma ne janjal nehn pwungamwai kan.
2 Kamwai pel kapkap pwa Koahs en kapisla kamai jang armaj juwed apel nauna kan. Pwa jaudi armaj ohroj kin kamehlele Mahjanno.
3 A Koaunno ma loalpwoas. Ih pirin kasihkeida kamwai apel neknekid kamwai jang ih ma naunahu.
4 Doari, Koaunno kin kupwuroahda pwa kamai en koapwoarpwoarki kamwai; kamai koapwoarpwoar pwa kamwai kin wihwia, apel pirin nansihoang wihwia mehkan ma kamai kin padahkihoang kamwai.
5 Mweidoahng Koaunno en kaweid kamwai en woahwoahkihla unjek limpoak in Koahs apel kanangmah ma liklikdo jang Christ.
Pwukoahn Doadoahk
6 Riamai kan, in oadoan asai Koaun Jesus Christ kamai kangoangehki kamwai en kalke kamwai jang joauloang kan ma mour in dangahnga, ma johpwa kin peikkoang poanoau kan ma kamai kin padahkihoang irai.
7 Pein kamwai inenin kidal pwa kamwai koanoahng wia doahroar da ma kamai kin wia. Kamai johpwa dangahnga anjoauwo ma kamai mine ipamwai.
8 Kamai johkin oaloa jauwaj jang armaj joah lipilpil ma kamai johkin dupuk. In mehlel, kamai kin doadoahk koalik apel apwal; kamai kin engdehn inpwong inrehn pwa kamai en joah kadroapwoa emen emen kamwai.
9 Kamai kin wia me, jaudi pwa joh amai pwung in oaloa jauwaj jang kamwai, a pwa kamwai en kahlmoangi kamai.
10 Nehn amai kin minmine ipamwai kamai kin pwehng kamwai, “Ma emen ma johpwa nimen doadoahk, a en jehpwili mwinge.”
11 Kamai pwa me pwa kamai rong ma pwa mine armaj pwi nehn pwungamwai ma kin onohn mwahl, ma johpwa kin wia mehkij, a kin kadroapwoa doadoahk in epwi armaj.
12 Doari, in oadoan asai Koaun Jesus Christ kamai koajoanehdihoang armaj pwiai apel kangoangehki irai en weweidki mour pwung apel doadoahk pwa irai en kak pein koadoahkoahda arai mour.
13 A kamwai, riamai kan, kamwai joah koakoahkki wihwia mwehu.
14 Dapwa mine armaj nehn pwungamwai kan ma jehpirin peik oang padahkko ma kamai kadarwehng kamwai nehn nihmai kijilikoau oauwe. Ma mine, kamwai kilelehdi irai pwa kamwai en joah pasoahng irai pwa en kamehkihda irai.
15 Kamwai joah wiahki irai amwai imwinsihsi, a kamwai poanoauwi in doahroar riamwai joauloang.
Koarjoahklahn Rahnmwahu
16 Pein Koaunno, ma ioar pwarer in asai popohl, en kioang kamwai popohl anjoau ohroj apel in joang ohroj. Koaunno en minmine ipamwai ohroj.
17 Jang in pein mengin poaihoa ma insingehdi me: Rahnmwahu jang Paul. Ioar mwomwen oai kin koarjoahla kijilikoau ohroj; ioar doahr oai kin saini.
18 Kalahngan en asai Koaun Jesus Christ en pwilpwili kamwai ohroj.