2
Armaj Juweddo
1 Pid japahldohn asai Koaun Jesus Christ, apel doahr asai pirin pokonpene ipoa: ngoah poaki kamwai, rioai kan,
2 en joah pispisin pingda nehn amwai lamlam ke pwunodkihda sikesikko ma kadehde pwa Rehnin Koaunno ne leldo. Dapwa mine lamlam ma pwa ioar mehwa kamai sikoa nehn anjoau in kokohp ke padahk, ke insingdi nehn kijilikoau oau.
3 Johpwa mweidoahng emen armaj en pisihdi kamwai nehn iroa joah lipilpil. Rehnin Koaunno jehpirin indoa oaroh koarjoahklahn Uhpene wiawihla, a Armaj Juweddo pwokda, ih ma pirin inenlahng nehn ehl.
4 Armaj Juweddo pirin pallanda kohs likamw ohroj ke dipwjoau ma kin doadoahk nehn joaroawi kan; apel kajapwilda pein ih pohnangin irai ohroj. Ih pirin dilda mwindi nehn en Koahs Umwen Joarwiho, apel pwa ih Koahs.
5 Kamwai johpwa saman? Ngoah ne pwehng kamwai joang pwiai ohroj anjoauwo ngoah mine ipamwai.
6 Leldo apkas, minehr mehkij ma kahrehng joang pwiai en joah wiawi anjoaukije; a kamwai kidal mehkijjo. Doari, nehn anjoauwo ma koanoahng, Armaj Juweddo pirin pwokda.
7 A Nauna Rirro ne pwen doaula doadoahk, a da ma pirin wiawi jehpirin wiawi oaroh da ma iroahdi en kihekjang.
8 Nehn anjoaukijjo, Armaj Juweddo nen janjalda; a nehn en Koaun Jesus indoa, Ih pirin kojukkihdi Armaj Juweddo ki engin oawoa apel kamwomwla Armaj Juweddo ki Ah maram kapwuriamwei.
9 Armaj Juweddo pirin indoa audohdki manman in Jehsen apel wiahda joangoan manman apel kapwuriamwei likamw ohroj.
10 Ih kapweipweiki iraihok ma pirin kerpwihekla joangoan widing ohroj. Irai pirin kerpwihekla pwa irai johpwa kajamwo apel ipwilki mehlello pwa irai en koamoaurla.
11 Joanngoauwe kahrehda Koahs kadardo manman in japwung en doadoahk nehn loaloarai pwa irai en kamehlele da ma johpwa mehlel.
12 Imwin joanngoauwe ioar me: irai ohroj ma johpwa kamehlele mehlello, a pwen kin perenki dihp, pirin kerpwihekla.
Kamwai ioar Pilpildahng Koamoaur
13 Riamai kan, kamai koanoahng kapingkalahnganki kamwai oang Koahs anjoau ohroj pwa kamwai ma Koaunno kin ipwilki. Pwa Koahs ne pilda kamwai en wia sapin Nah armaj joaroawi ma pirin mourla jangin manman in Ngen Joaroawi apel mourla jangin amwai pwojon me mehlello.
14 Koahs ne pangin kamwai oang me jangin Rongmwehuwo ma kamai ne padahkki oang kamwai; Ih ne pangin kamwai en pwili anki ling in asai Koaun Jesus Christ.
15 A doari, riamai kan, uhda soangsoang apel kolkoldi oang iroa mehlel kan ma kamai ne padahkihoang kamwai nehn amai padahk kan apel nehn nihmai kijilikoau kan.
16 Mweidoahng pein asai Koaun Jesus Christ apel Jamasai Koahs, ma ne ipwilki kisai apel jangin Ah kalahngan kioang kisai kangoang ma johkin japwungla apel koapwoarpwoar soangsoang,
17 en kangoange kamwai apel kasihkei kamwai en joah uhdi wia apel sikoa da ma mwehu.