Nihn Paul Kijilikoau Kariau oang Mwomwohdjohn
Thessalonica
Oarlap in Kijilikoau oauwe
Jalelpoak doahr indoa kariau in Christ wihwiawihoar nehn mwomwohdjohn Thessalonica, kahrehda pingping koalik nehn pwungen joauloang kan. Nihn Paul kijilikoau kariau oang Mwomwodjohn Thessalonica pidda lamlam in sohn mwomwohdjo ma pwa rehnin japahldo kariau in Christ ne leldo. Paul koapwungla lamlam oauwe in ah kajalehda pwa mwohn indoa kariau in Christ nauna in armaj kan pirin wikla mehlel pirin kaweid jang emen ma pirin adanki “Armaj Juweddo,” ma pirin uhwoang apel pallanda Christ.
Wahnpoaroan Paul inenin padahk sihkeikihoang mihn Thessalonica pwa ihr en kin kahkahkauj, soangsoang nehn ahr pwojon, mihn ma ihr kin lelloang nehn apwal apel loklok, a ihr en kin doadoahk doahroar ih apel ioange sohndoadoahk kan, apel ihr en kahkahkauj nehn ahr wihwia mwehu kan.
Audoapoan Kijilikoau
Sapin Kijilikoau 1:1-2
Kaping apel Wahu1:3-12
Padahk doahroar japahldohn Christ 2:1-17
Kangoang kan oang mour in joauloang 3:1-15
Koarjoahklahn kijilikoau 3:16-18
1
1 Jang Paul, Silas apel Timothy —
Oang sohn mwomwohdjohn Thessalonica, ma wia kijehn Jamasai Koahs apel asai Koaun Jesus Christ:
2 Kalahngan apel popohl jang Jamasai Koahs apel Koaun Jesus Christ oang kamwai.
Kadeikko nehn Anjoau in Japahldohn Christ
3 Riamai koa, kamai uhdahn pirin kapingkalahnganki oang Koahs nehn anjoau ohroj ki kamwai. Inenin koanoahng kamai en kin kaping, pwa amwai pwojon en kin koakoairda mehlel apel limpoak ma emen emen kamwai anki oang epwi armaj ne pel koalkoalikla mehlel.
4 Ioar kahrpoahioauwe kamai kin kamjehkki kamwai nehn en Koahs mwomwohdjo kan. Kamai kamjehkki doahr amwai joah uhdihjang kanangmahioang apel kamehlele nehn koaloklok kan apel moadoak kan ma kamwai kin lelloang loaloa.
5 Joang pwiai ohroj ioar kadehdehda pwa kadeik in Koahs pwung; imwlahn joang pwiai, kamwai pirin pwungla nehn en Koahs weiho, ma ioar kamwai kin loklokki.
6 Pwa Koahs pirin wia da ma pwung, Ih pirin koalkoa iraihok ma kin koalkoa kamwai.
7 Ih pirin kioang kamwai apel kamai ma loklok koammoal. Ih pirin wia joanngoauwe anjoauwo ma Koaun Jesus pirin japahldo jang nehnloannge pasoahng Nah sohnloang laplappok,
8 pwokkihdo oai umpwumpwul en koalkoa iraihok ma kia oaloahda Koahs apel iraihok ma johpwa peik oang Rongmwehu in asai Koaun Jesus.
9 Irai pirin koaloklokki loklok joahsuk, ma woahwoahki arai pirin sohrohrjang mwohn mijen Koaunno apel jang Ah manman ling,
10 en oaloa klohri jang Nah armaj kan ohroj apel wahu jang iraihok ma kamehlele. Kamwai pel pirin pwilihla irai pwa kamwai ne kamehlehla padahkko ma kamai ne padahkihoang kamwai.
11 Ioar kahrpoahwa kamai johkin uhdi kapkapki kamwai. Kamai poaki asai Koahsso en wiahng kamwai en warroang mourro Ih ne panginnoang kamwai en mourki. Mweidoahng Koahs en audohkihla kamwai, jangin Ah manman, amwai inoang kan ohroj oang kemwehuwihla apel kaunjekihla amwai doadoahk in pwojon.
12 Jangin mwommwoauwe, oadoan asai Koaun Jesus pirin janjaldihda lingin klohri jang kamwai; a jang Ipoa, kamwai pirin lingkihla kalahngan in asai Koahsso apel Koaun Jesus Christ.