5
Koaunopda oang Japahldohn Koaunno
1 Riamai kan, joh anahn in insighkihwehng kamwai iren anjoau kan apel irair kan ma joang pwiai pirin wiawi.
2 Pwa pein kamwai inenin kidal mwehu doahroar Rehnin Koaunno ah pirin leldo doahroar sohnpirap men ma kin indoa inpwong.
3 Nehn anjoauwo ma armaj pwa, “Joang ohroj pwen moaloailoai apel joh me keper,” ioar anjoauwa ma apwal koalik pirin pispisinnoar lel irai! Joanngoauwe pirin wiawi pispisinnoar moadoak kan ma lel oang lihmen ma pirin noaisik; a armaj jehpirin pisjang.
4 A kamwai, rioai kan, kamwai johpwa mine nehn ros, doari, Rehnno johpwa pirin kapwuriamwei nehn ah pirin lelloang kamwai, doahroar sohnpirap men.
5 Kamwai ohroj ioar armaj ma kijehn maram apel inrehn. Kisai johpwa wia kijehn inpwong ke ros.
6 Doari, kisai joah koanoahng moair doahroar epwi, a kisai koanoahng poahd apel onnonop.
7 Inpwong ioar anjoauwa armaj kin moair apel inpwong ioar anjoauwa armaj kin jakaula.
8 A kisai kijehn rehn, doar, kisai en onnonop, kisai kapwaskihda pwojon apel limpoak, doahroar mihn poarpoar in nehn pwalah, apel asai koapwoarpwoar in koamoaur doahroar pwoaipwoai oau.
9 Koahs johpwa pilda kisai pwa kisai en loklokki Ah lioas, a kisai en anki mour joahsuk in oadoan asai Koaun Jesus Christ.
10 Ih mehkihdi kisai pwa kisai en kak pwili Ih mour, mihndahr ma kisai mour ke mehdi anjoauwo Ih pirin indoa.
11 Doari, kamwai kasihkeiida emenemen kamwai, apel jauwajpene, doahr amwai kin wihwia anjoau oauwe.
Koarjoahklahn Poanoau kan apel Rahnmwahu kan
12 Riamai kan, kamai poaki kamwai en kin woaunki irai kan ma kin doadoahk nehn pwungamwai kan, kaweid apel poanoauwi kamwai nehn mourin joauloang.
13 Kamwai woaunki apel ipwilki irai in mehlel, oang doadoahk kan ma irai kin wia. Kamwai en mour moaloailoai nehn pwungamwai kan.
14 Riamai kan, kamai kangoangehki kamwai en poanoauwi irai kan ma johkin wia mehkij, kasihkei irai kan ma kin jasihkei in lamlam, jeuweje irai kan ma jasihkei in palwar, apel kanangmah oang armaj ohroj.
15 Kamwai kanaihoang pwa joh emen en dupukkoang emen ah wihwia japwung; a anjoau ohroj, koajoanehdi amwai wihwia mwehu oang emen emen apel oang armaj ohroj.
16 Kamwai malau anjoau ohroj,
17 apel kapkap anjoau ohroj.
18 Kamwai kapingkalahngan oang Koahs in me ohroj. Pwa me ioar Koahs kin perenki en kin wiawi nehn amwai mour in oauwoang Jesus Christ.
19 Kamwai joah kakundi Ngen Joaroawi;
20 joah mwamwahlki kokohp.
21 Kajawi me ohroj: koldi me mwehu.
22 Kadohjang kamwai me nauna ohroj.
23 Mweidoahng Koahs, ma kioang kisai moaloailoai, en wia oang kamwai en joarwihla nehn joang ohroj apel kolkol kamwai — ngenimwai kan, mohngiongimwai kan, apel palwoaroamwai kan — en jaldek jang joangoan japwung ohroj anjoauwo ma asai Koaun Jesus Christ pirin japahldo.
24 Ih ma pangindo kamwai pirin kapwaihahda me, pwa Ih ma loalpwoas.
25 Riamai kan, kamwai kapkapki kamai.
26 Kamwai rahnmwahuwihki riasai joauloang kan ohroj misik joaroawi.
27 Ngoah poaki kamwai, jangin manman in Koaunno, en wadek kijilikoau oauwe oang joauloang ohroj.
28 Kalahngan en asai Koaun Jesus Christ en pwilpwili kamwai.