4
Mour oau ma kin Kaperenda Koahs
1 Doari, riamai kan, kamwai ne kidalda jang kamai mourro ma kamwai koanoahng mourki pwa en kaperenda Koahs. Ioar me, in mehlel, ioar mour wa kamwai kin mohmourki. A anjoaukije, kamai poaki in ngidngid apel kangoange kamwai in oadoan Koaunno Jesus pwa kamwai en doaudoaula nehn mour oauwe.
2 Pwa kamwai ne kidal kaweid kan kamai ne kioang kamwai jangin manman in Koaun Jesus.
3 Koahs kin kupwurki kamwai en joarwihla apel jaldekla unjek jang nenek.
4 Emenemen kamwai kan en pwen sihkei in kolkol amwai mour joaroawi apel woaun,
5 jaudi in inoang juwed, doahr armaj rosros kan ma jehjoa Koahs.
6 Doari, nehn irair oauwe, joh emen in kamwai koanoahng wia japwung oang joauloang kan ke ijankihla ahr jawehwe. Kamai ne pwehng kamwai iroahioauwe mwowoa, apel ngoangla kaperihki kamwai pwa Koaunno pirin koalkoa irai kan ma wia irair japwung oauwe.
7 Koahs johpwa pangin oang kisai nehn mour jamin, apwen oang nehn mour joaroawi.
8 Doari, emen ma kia rong kaweid oauwe, jaudi armaj ioar ih kia rong, pwa Koahs, ma ioar kioang kamwai Nah Ngen Joaroawi.
9 Johpwa anahnepen kamai en insingkihwehng kamwai doahr amwai en ipwilki riamwai joauloang kan, pwa Koahs ne pwehng kamwai doahr amwai en ipwilpene nehn pwungamwai kan.
10 Doar me kamwai ne ipwilki riamwai joauloang kan ohroj nehn Macedonia pwon. Doari, riamai kan, kamai poaki kamwai en wonwei nehn limpoak oauwe.
11 Wiahkihla amwai koajoandi kamwai en mourki mour moaloailoai, wihwia pein amwai doadoahk, apel koadoahkoahda pein amwai mour, doahroar amai ne pwehng kamwai mwowoa.
12 Pwa me ioar doahr amwai pirin mwehula mwohn ihr ma johpwa pwojon, apel kamwai ne pel joah anki anahn jang emen sohrohr.
Indoahn Koaunno
13 Riamai kan, kamai nimen kamwai en kidalla mehlel in doahr irai kan ma ne mehdi, pwa kamwai en joah kin injinjuwed doahr irai kan ma joh ahr koapwoarpwoar,
14 a kisai pel kamehlele pwa Koahs pirin kapwurihla Jesus pasoahng irai kan ma ne mehdi nehn arai pwojon Koahs.
15 Joang pwiai ma kamai padpadahkihoang kamwai ioar en Koahs padahk: kisai kan ma mour rehnno Koaunno indoa jehpirin inla mwohn irai kan ma ne mehdi.
16 Pwa ngilen ruwoj oau pirin wiawi, ioar ngilen sohnloang laplap men, apel ngilen nihn Koahs jowi pirin peido; doari pein Koaunno pirin indihdo jang nehnloannge. Irai kan ma ne mehdi nehn arai pwojon Christ, ioar pirin pwohrda mijoa.
17 A mwerin kisai ohroj ma mour oar pirin pasoahng irai pwili pwoakpwoakdahla pohn koasoau pwa kisai en suhwoang Koaunno nehn woahwoa. Apel ioar doahr asai pirin pwili Koaunno allaluhla.
18 Doar kamwai kasihkeiiki emen emen padahk pwiai.