3
1 Nehn amai ne johla kak en kanangmah joujowi, ioar kamai ne lemehkihda kamai en ken kalahpwuk pwen mine nehn Athens
2 kamai kadarwehng kamwai Timothy, riasai joauloang, ma kin pwili kamai doadoahk oang Koahs nehn amai kalohkihjili Rongmwehu en Christ, ih en kasihkei apel jeuweje amwai pwojon,
3 pwa johpwa emen kamwai en kerpwihla pwojon ki joangoan kahpwal pwiai. Pein kamwai pel kidal ma joangoan kahpwal pwiai ioar kijehn en Koahs koajoandi oang kisai.
4 Pwa nehn anjoauwo ma kamai mine ipamwai, kamai ne pwehng kamwai, mwohn ah wiawi, pwa kisai nen koaloklok; a nehn amwai ne inenin kidal, koaloklok ioar mehwa ne wihwiawi.
5 Joanngoauwo ioar kahrehda ngoah ken anahne kadarwe Timothy. Ngoah ne johla kak jowi mwuhr, doari ngoah ken kadar ih en soahkda iren amwai pwojon. In mehlel, ngoah perki pwa ma Jehsen doari ne kajongjongi kamwai, a doari, amai doadoahk ohroj ken johla kaspoa!
6 Apkas, Timothy ne japahldo. Ih ne wahdo rong kapiren ma pid amwai pwojon apel limpoak. Ih ne pwehng kamai pwa kamwai kin, anjoau ohroj, anki lamlam mwehu oang kamai. Ih pel pwa kamwai pel nimen suhwoang kamai doahroar kamai pel nimen suhwoang kamwai.
7 Doari, riamai kan, kamwai ioar ne kangoangehda kamai nehn amai apwal apel loklok ohroj. Ioar amwai pwojon ioar ne kangoangehda kamai,
8 Apkas kamai pwanah poaroahpoa mohngla pwa kamwai uhda soangsoang nehn amwai mour in oauwoang asai Koaun.
9 Apkas, kamwai kahrehda kamai ne kak kapinga Koahs. Kamai kapinga Ih ki peren kamai anki nehn Ah minmine ipamai ki kamwai.
10 Inpwong inrehn kamai, jang nehn amai mohngiong unjek, poaki Ih en mweidoahng kamai en kapang mijamwai kan apel jauwajki joang ohroj kamwai anahne nehn amwai pwojon.
11 Mweidoahng Jamasai Koahs apel asai Koaun Jesus en koaunopda allo kamai en wud loaloa lelwe ipamwai.
12 Mweidoahng Koaunno en wiahng amwai ipwilki emen emen apel armaj ohroj en koalkoalikla apel woahroarla amai limpoak oang kamwai.
13 Nehn joangoan mwommwoauwe, Ih pirin kasihkeila kamwai. Kamwai pirin unjekla apel joarwihla mwohn Jamasai Koahs anjoauwo asai Koaun Jesus japahlda pwilihki ohroj irai ma Nah. [Amen.]