2
En Paul Doadoahk nehn Thessalonica
1 Doari, riamai joauloang kan, pein kamwai kidal doahr amai paj ipamwai ma inenin pwoaida mwehu.
2 Kamwai pel kidal doahr amai oaloa loklok apel wia mwahlla nehn Philippi mwohn amai lelloang ipamwai nehn Thessalonica. A kamai pwen anki sihkei jang ipen Koahs pwa kamai en padahkihoang kamwai Rongmwehuwo ma indoahjang Ipoa, mihnda ma koalik en armaj uhwoang.
3 Amai poakpoak ngidngid oang kamwai johpwa poahjoankihda japwung, ke koajoandi joah mehlel, ke jongjong en widingehdi emen.
4 A in mehlel, anjoau ohroj kamai kin sikesik in mwommwo Koahs mwehuki kamai en wia pwa Ih ne pwungki pel mweidoahng kamai en koanoahng oaloa pwukoahn kalohki Rongmwehuwo. Kamai johkin jong in mwehula ipen armaj, a kamai en mwehula ipen Koahs, ma kin kajawi amai mwoakid kan.
5 Kamwai dehdehki pwa kamai johpwa indoahng widinge kamwai ke pel doadoahkki sikesik in pwaindi noaroak; Koahs ioar nihmai jounkadehde!
6 Kamai johpwa jong in oaloa kaping jang armaj joah lipilpil, ma jang kamwai ke jang armaj sohrohr,
7 mihndahr ma kamai wia wahnpoaroan in Christ ma kak ipong kamwai ki amai anahn kan. A joah, pwa kamai pwen kadek anjoauwo kamai mine ipamwai, doahroar nohno men kin kanaihoang nah jeri kan.
8 Jangin in amai ipwilki kamwai, kamai ne onopdahng oaukihoang kamwai, jaudihoar Rongmwehuwo jang Koahs, apwen pel kamai mour. Kamwai inenin kajampwal ipamai!
9 Riamai kan, uhdahn kamwai saman mwomwen amai doadoahk koalik, woaroai, apel soausoau! Kamai kin doadoahk inpwong inrehn pwa kamai en joah kajoahpijekihla kamwai nehn anjoauwo ma kamai padahkihoang kamwai Rongmwehuwo jang Koahs.
10 Kamwai ioar nihmai jounkadehde koa, apel pwilihki Koahs, pwa amai wihwia oang kamwai ma kamehlele, pwen mwakelkel, pwung, apel joh japwungin.
11 Kamwai kidal pwa da kamai kin wiahng emen emen kamwai pwen doahroar en pahpa kan kin wiahng nihrai jeri kan.
12 Kamai kin kasihkeii kamwai, kamai kin kainjenmwahuwi kamwai, a kamai kin pel kangoangoange kamwai en mourki mour oau ma kaperenda Koahs; Koahs kin pangin kamwai en pwili anki Ah weiho apel klohri.
13 A mine pel oau kahrpoa ma kamai kin kapingkalahngan oang Koahs anjoau ohroj. Anjoauwo kamai wahdohng kamwai Mahjan en Koahs, kamwai rong apel oaloahda, jaudi pwa padahk jang armaj, apwen en Koahs padahk, ma pwen mehlel ioar padahk jang Koahs. Ioar Koahs kin doadoahk nehn kamwai ma kamehlele.
14 Riamai kan, joang kan ma wiawihoang kamwai pel wiawihoang nihn Koahs kan nehn mwomwohdjo en Judea, oang nihn Christ Jesus armaj kan wijahu; joangoan loklok wahr ma kamwai oaloa jang sohn amwai wei ioar irai pel oaloa jang ipen mihn Jew kan,
15 ma kojukdi Koaun Jesus apel joukohppok, pel kajroahla kamai. Ia uhwen ahr jekenken ipen Koahs! Ia uhwen arai lemei oang armaj kan ohroj!
16 Irai pel jong in iroahdihjang kamai en padahkihoang mihn likin kan Mahjanno ma pirin kamourihla mihn likin kan. Me ioar doahr koalik in diparai kan ohroj ma irai kin wihwia anjoau ohroj. Doari, in imwla en Koahs lioas ne aluhwoang pohn irai!
En Paul Inoang in Pwuroahng Suhwoang Irai
17 Riamai kan, a oang kamai, nehn anjoau kij ma kamai sohrohr jang kamwai — jaudi nehn amai lamlam a in mehlel pwen palwar — ia uhwen amai loaleidkihda kamwai apel inenin engdehn in pwuroahng kapang kamwai!
18 Kamai ne nimen pwurwe ipamwai. Pein ngoah ne jongin japahlwe pehn dirjang oau, a Jehsen johpwa mweidoahng kamai.
19 Mwerin me ohroj, ioar kamwai — kamwai, johpwa siksik jang epwi armaj! — ma ioar amai koapwoarpwoar, amai malau, apel amai kahrpoahwa in juweiki amai kalwehdi anjoauwo kisai pirin uhda mwohn asai Koaun Jesus rehnno ma Ih japahldo.
20 In mehlel, kamwai ioar amai klohri apel peren!