Nihn Paul Kijilikoau Keiou oang Mwomwohdjohn
Thessalonica
Oarlap in Kijilikoau oauwe
Thessalonica kahnihmw oau ma poajoan koaun in wein Macedonia ma kijehn Rome. Paul kouda mwomwohdjo oau wijahu mwerin ah injang Philippi. A mine mihn Jew pwi ma kin uhwoang Paul. Ihr kin pihrinnoang Paul pwa ah doadoahk koalik in Rongmwehu inenin pwoaida mwehu ipen mihn likin kan ma nimen pwilihla loapin lamlam in mihn Jew. Ioar Paul kokouj jang wijahu, apel ih ken inlahng Berea. Mwerin ah lel Corinth, ih rongda doahr iren mwomwohdjohn Thessalonica jang ipen nah woaroak apel ioange Timothy.
Nihn Paul kijilikoau keiou oang Mwomwohdjohn Thessalonica ne insingdi pwa en kangoangehda apel kasihkeiida joauloang in wijahu. Ih kapingkalahnganki ronngo ma ih oaloahdi doahr ahr pwojon apel limpoak. Ih kasmankihoang irai doahr joangoan mour ma ih ne wia nehn ah koaukoaujoan iparai. Ih wia pajpoang in iroa pwi ma ne pwokda nehn mwomwohdjo doahr kariau indoahn Christ: Doahr en joauloang men ma mehdi mwohn japahldohn Christ, ih pel pirin pwili anki mour joahsuk ma japahldohn Christ pirin kahrehda? Doar ngehd Christ pirin japahldo? Paul pel ijanki padahkihoang irai ihr en uhjehlahr ahr doadoahk in joauloang apel kajkajik nehn koapwoarpwoar mehlel japahldohn Christ.
Audoapoan Kijilikoau
Kapehje 1:1
Kajpahl kalahngan apel kaping 1:2—3:13
Kangoang in mourin joauloang 4:1-12
Padahk doahr indoahn Christ 4:13—5:11
Kaimwjeklahn kangoang kan 5:12-22
Kaimwjeklahn kijilikoau 5:23-28
1
1 Jang Paul, Silas apel Timothy —
Oang sohn mwomwohdjohn Thessalonica, ma kijehn Koahs Jahm apel Koaun Jesus Christ:
Kalahngan apel popohl oang kamwai.
En Mihn Thessalonica Mour apel Pwojon
2 Anjoau ohroj, kamai kalahngankihoang Koahs kamwai ohroj apel saman kamwai nehn amai kapkap.
3 Kamai saman mwohn Jamasai Koahs, doahr amwai kin doadoahkki amwai pwojon, doahr amwai limpoak ne wiahng kamwai en doadoahk inenin koalik, apel doahr soang in amwai koapwoarpwoarki asai Koaun Jesus Christ.
4 Riamai joauloang kan, kamai kidal pwa Koahs ipwilki kamwai apel pilda kamwai en wiahla Nah.
5 Pwa kamai ne kalohki oang kamwai Rongmwehuwo, jaudi in lallal oar doari, a jang in manman apel Ngen Joaroawi, apel jang in amai kamehlele unjek mehlel in Rongmwehuwo. Kamwai kidal doahr amai mour jang in amai mine ipamwai, pwa ioar wia kemwehupamwai.
6 Kamwai kahlmoangki kamai apel Koaunno; mihndahr ma kamwai loklokki, a kamwai malau oaloahda Mahjanno ma indoahjang Ngen Joaroawi.
7 Doari, kamwai ne wiahla mihn kahlmoang oau oang joauloang ohroj nehn wein Macedonia apel Achaia.
8 Pwa jaudihoar Mahjan en Koaunno lohkpijoang jang kamwai oang nehn Macedonia apel Achaia pwon, a rong en amwai pwojon Koahs ne pel lohkpijoang wija ohroj. Doari, joh mehkij kamai pel koanoahng sikoa.
9 Ohroj irai armajjok sikoa doahr amwai ne kajamwo kamai nehn amai paj ipamwai, apel doahr amwai ne pwurjang janjal sakai kan, pwurdohng Koahs pwa kamwai en papah Koahs mehlello apel mourro,
10 apel doahr amwai kajik Nah Iehrojjo en japahldo jang nehnloannge — Nah Iehroj Jesus, ma Ih kaiejda jang mehdi, ma pirin kapisla kisai jang en Koahs lioasso ma pirin indoa.