2
Jounpadahk Likamw kan
1 Joukohp likamw pwi ne pwokda nehn pwungen armaj mehjwa, apel in joanngohr, jounpadahk likamw kan pirin pwokda nehn pwungamwai kan. Irai pirin wahdo mihn koauwehla, padahk joh mehlel, apel pirin kahmahmkihla Koaunno ma koamoaurla irai; a doari, irai pirin wahdohng irai en koauparai pispis.
2 Pel doahroar me, dir pirin pwilihla arai wihwia nauna kan; a ki jangin da irai wia, epwi pirin sikoa nauna in Al mehlello.
3 Nehn arai noaroak, irai jounpadahk likamw pwiai pirin koapwoahpwoahkihla arai pwehng kamwai poadpoad likamw. Anjoau woaroai, arai Jounkoapwungwa ne onopda, apel arai Jounkoauwehlawa pwanah poahd kapwrehre!
4 Koahs johpwa doaroahla sohnloanngok ma ne wiahda dihp, a Ih kerpwihdihla irai nehn ehl, wijahu ma ros ma irai ne joalkihdi joal pahrang, joujowi Rehnin Kadeikko.
5 Koahs johpwa doaroahla jampah kawahu, a Ih wahdo Nohlik Laplappo pohn jampah pohn armaj joah pwojonnok; iraihok ma Ih koamoaurla ioar Noah, ma ne padahkihjili mour pwung, apel pwilihki armaj ijimen.
6 Koahs ne kariahla kahnihmw in Sodom apel Gomorrah, koauwehkihla kahnihmw kai oai, apel ne wiahng pwa ira en wia kadehde in joang kan ma pirin wiawihoang armaj joahpwojon kan.
7 Ih doaroahla Lot, woal pwung men, ma ne apwalkihda siahk nauna in armaj kan ma johkin kapwaihahda kojonned.
8 Lot, woal pwunngo, kin koaujoan nehn pwungarai, a rehn ohroj, ih kin moadoakla nehn ah kapang apel rong arai wihwia nauna kan.
9 A doari, Koaunno kidal imdoahr ih en kapisjang armaj poadidi kan nen ahr apwal kan, apel kidal imdoahr ih en neknekid oang armaj nauna kan loklok oaroh lel Rehnin Kadeikko,
10 a in mehlel, irai kan ma kin kapwaihahda inoang jamin in palwoaroarai kan apel kin mwamwahlkihla en Koahs manman kan.
Jounpadahk likamw pwiai pwen eimah apel aklaplap, apel kajale arai joah woaunki lingin mihn puwoa kan; ioar irai wia lal kamoadoak oang irai.
11 Pein sohnloanngok, ma sihkei apel manman koalik jang jounpadahk likamw pwiai, johkin lahlahwe irai kan ma minmine ipen Koaunno.
12 A joangoan armaj pwiai mwoakidki arai poapoahm, doahroar mahn ingkel kan, ma noaisikdihoang kolkoldi apel kojkojdi; irai pallan apel koauwe joang joah lipilpil ma irai johpwa woahwoahki. Irai pirin koauwehkla doahroar mahn ingkel kan,
13 apel irai pirin dopdopki koaloklok pwa jangin koaloklok irai kin wiahda. Irai kin wia mehkij ma kapiren oang irai nehn irai kin wia joang joah lipilpil nehn maram ma wia mihn kainjenmwahuwi palwoaroarai; irai wia mihn kamehk apel joh woaun nehn arai kin pwili kamwai mwinge, nehn oaroain anjoauwo perperenki arai wioapoa likamw kan!
14 Joh mehkij irai nimen rapahki, ioarroar irai en kamwahl. Arai inoang in wia dihp johkin isar. Irai kin kahlwahng armaj jasihkei kan nehn lidip. Arai mohngiong kan ne kaihahnda en noaroak. Irai ne minehla pehn en Koahs karia!
15 Irai ne injang nehn al inenno apel ne jehjoahla arai alwa; irai ne kaujla nehn alin Balaam, nihn Beor, ma noarkoahda mwani ma ih pirin oaloa jangin wihwia japwung,
16 ih ken woarwoarihekkihda dipoa kan. Nah ejello ma lalloang in ngilen armaj apel kauhdi joukohppo jang ah wihwiahn armaj pweipwei.
17 Armaj pwiai ioar doahroar pilsiksik pwi ma ne enngengda, doahroar koasoau pwi ma melmel kin pohkjili; Koahs ne kasohrohrihla wijahkij oang irai nehn wijahu ma keiou ros.
18 Irai kin wiahda kapahrak in lehmwsik pwi ma joh audoapoa, apel kin doadoahkki siahk jamin in inoang in palwar pwa en lidipihoang irai kan ma kapwehsene pisjang ipen armaj ma mour japwung.
19 Irai inoaukihoang irai jaldek, a pein irai ioar wihwia lidu in mwoakid in koauwehla irai — pwa kisai ioar lidu in joang joah lipilpil kan ma ne koaunda kisai.
20 Pwa ma armaj kan pisjang pehn manman sihkei in jampah oauwe ki jang in ahr maramkihla asai Koaun apel Jounkoamoaur Jesus Christ, a irai ken pwuroahng kolkoldi apel lohdihoang pehn manman pwiai, joangoan armaj pwiai pirin nauna douluhl in imwla jang in sapdahu.
21 Nen pwen mwehuwoang irai ma irai pwen johpwa maramkihla pwungin kalahngan in Koahs jang nehn irai kidalla, a mwuhr irai jipwoaljang mahjan joaroawi ma kihekkoang irai.
22 Da ma pwoaida iparai kadehdehda doahr mehlel in loapin lallok, ma pwa, “Doahk men kin pwuroahng kangla ah umwujjo,” apel, “Pij men ma ne kamwkelda, kin pwuroahng sapwor nehn pwelmasak.”