3
Inoau in en Koaunno Japahldo
1 Oai pirien kan, kijilikoau oauwe ioar kijilikoau kariau ngoahi ne insingihwe oang kamwai. Nehn kijilikoau riau oauwe, ngoahi ne jong en kamwoakidihda amwai lamlam mwakelkel jangin kasmankihoang kamwai mehpwiai.
2 Ngoahi nimen kamwai en saman padahk kan ma joukohp joarwihok ne sikoahda mehj, apel kojonneddo jang Koaunno apel Jounkoamoaur ma amwai wahnpoaroannok ne kioang kamwai.
3 Keiou, kamwai anahne woahwoahki pwa nehn rehn in imwlahn anjoau, epwi armaj, ma arai mour kin koaunkihda inoang nauna, pirin pwokdo. Irai pirin kauruhrki kamwai
4 apel pirin idoak, “Ih ne inoauki pwa Ih en indoa, jaudi? A ia Ih? Asai pahpa koalikkok ne mehdi, a joang ohroj pwen doahrwahr jang anjoauwo ma jampah kapikpikda!”
5 Irai koajoanehdi pwa irai en pohnjehjoa pwa in mehlel mehj Koahs ne mahjan, a ioar nehnloannge apel jampah ne kapikpikda. Jampahioauwe ne wiawihda jang nehn pil apel jang pil,
6 apel ioar jang pil, pil in nohlikko, ioar koauwehla jampah merinngo.
7 A nehnloannge apel jampah ma apkas minmine ioar ne nekidekla jangin Mahjannoauwe, pwa en ohkihla oai. Nehnloannge apel jampah ne kolkoldi oang rehnno ma armaj joah pwojonnok pirin kadeikda apel kamwomwla.
8 A johpwa moalkoahla mehkij, oai pirien! Joh wikpijoang in en Koaunno kapang nehn pwungen rehn oau apel johnpar kid; oang Ih, ara doahroauwoar.
9 Koaunno johkin kos in wia da ma Ih inoaukihda, ma doahr epwi kin leme. A joah, pwa Koaunno ioar ma kin kanangmahioang kamwai pwa Ih johpwa nimen emen joah lipilpil en kamwomwla; a Ih mwehuki armaj ohroj en pwurjang diparai kan.
10 A Rehnin Koaunno pirin indoa doahroar sohnpirap men. Nehn Rehnno, nehnloannge pirin joaloangla in ngil koalik kamajpwehk oau; joang ohroj nehnloannge pirin okda apel kamwomwla, apel jampah apel joang ohroj loaloa pirin johrla.
11 Jangin mehpwiai ohroj pirin kamwomwla nehn joangoan wioapoahioauwe, joangoan armaj dahpwi koanoahng kamwai en wia? Amwai mour kan koanoahng en joaroawi apel kajarwihoang Koahs,
12 Nehn amwai joujowi en Koahs Rehnno apel wia uhwen amwai kak pwa en kapispisihdo — Rehnno ma nehnloannge pirin okda apel kamwomwla, apel joang ohroj nehnloannge pirin pilkihdi pwideng in oaiho.
13 A kisai jowi dahioau Koahs ne inoaukihdi; nehnloannge kapw apel jampah kapw oau, wija ma pwung pirin mine.
14 Doar oai pirien kan, nehn amwai joujowi Rehnno, mehpwiak en wiawi, wia uhwen amwai kak ohroj kamwai en mwakelkel apel joah japwung mwohn Koahs apel anki moaloailoai Ipoa.
15 Kapang en asai Koaunno kanangmah nehn Ah kioang kamwai anjoau mwehu in koamoaurla, doahroar en riasai Paul ne insingkihwehng kamwai, doadoahkki erpisso ma Koahs ne kioang ih.
16 Ioar me ma ih kin sikoa nehn nah kijilikoau kan ohroj doahroar iroahioauwe. Mine iroa apwal pwi nehn nah kijilikoauwok ma armaj jawoahwoa apel armaj johkin joandi irai kawoahwoahda japwung, doahroar irai wiahng epwi iren nehn Puk Joaroawi. Ioar doahr irai kin wiahioang irai pein koauparai.
17 Oai pirien kan, kamwai ne pwen kidal joanngoauwe. Kasoangehdi kamwai pwa kamwai en joah pwilihla japwung in armaj lollap apel kipla jang dohiamwai soanngo.
18 A doaudoaula koakoairda nehn kalahngan apel loalkoang in asai Koaun apel Jounkoamoaur Jesus Christ.
Oang Ih ioar klohriho, apkas apel allaluhla! Amen.