Kijilikoau Kariau jang
Peter
Oarlap
Kijilikoau kariau jang Peter ioar ne koadoaddoar oang pwihn koalik oau kijehn sapin pwihn in joauloang. Irair keiou kajampwal en kijilikoau oauwe ioar peihoang doadoahk in jounpadahk likamw kan apel mour nauna ma kin pwokda pwa jang in joangoan padahk pwiai. Wioapoan apwali kahpwal pwiai ioar janjal nehn soangsoang oang loalkoang mehlel in Koahs apel Koaun Jesus Christ; loalkoang oau ma ne lohkjili jang iraihok ma pein irai ne kapang Jesus apel rong Ih padahk. Peter, in mehlel, pwunodki padahk in irai kan ma sikoa pwa Christ jehpirin japahldo. Peter kin pwa ioar kahrpoan en Christ japahldo ken ekij kosla pwa jangin en Koahs “johpwa nimen emen joah lipilpil en kamwomwla; a Ih mwehuki armaj ohroj en pwurjang diparai kan.”
Audoapoan Kijilikoau
Sapin kijilikoau 1:1-2
Poangpoang oang joauloang kan 1:3-21
Jounpadahk likamw kan 2:1-22
Japahldohn Christ 3:1-18
1
1 Jang Simon Peter, lidu apel wahnpoaroan in Jesus Christ —
Oang iraihok ma, jangin pwungin asai Koahs apel Jounkoamoaur Jesus Christ, ne oaloahdi pwojon oau ma kajampwal doahroar amai pwojonne:
2 Kalahngan apel moaloailoai unjek en wiahla amwai jangin amwai loalkoangki Koahs apel Jesus asai Koaun.
En Koahs Poangpoang apel Pilpil
3 En Koahs manman unjekko ne kioang kisai joang ohroj kisai anahne oang mourki mour joaroawi mehlel jangin asai kidal Ih ma ne pangin kisai en pwili anki Ah klohri apel mwehu.
4 Jangin joanngoauwe, Ih ne kioang kisai kijakij kajampwal apel koalikkok Ih ne inoaukihda; pwa jangin kijakij pwiai, kamwai en kak pisjang inoang nauna kan nehn jampah ma mihn koauwehla, apel indoa pwili anki mour in Koahs.
5 Oang kahrpoahioauwe, wia uhwen amwai kak en kapsahng mwehu amwai pwojon; a oang mwehu, kapsahng loalkoang;
6 apel oang loalkoang, kapsahng amwai kak en pein koaunda kamwai; apel oang pein koaunda kamwai, kapsahng kanangmah; apel oang kanangmah, kapsahng joaroawi;
7 apel oang joaroawi, kapsahng ipwil in riari; apel oang ipwil in riari, kapsahng limpoak.
8 Ioar iroa pwiai ioar kamwai anahne, apel ma kamwai anki mehpwiai koalik, pirin wiahng kamwai en mwoakmwoakid apel mine lipwen amwai loalkoangki Koaun Jesus Christ.
9 A ma kamwai johpwa anki iroa pwiai, kamwai jadei mijamwaikan johkak kapangki apel ne moalkoahla pwa kamwai ne kamwkelda jang amwai dihp in mehj.
10 Doari, rioai kan, kamwai nansihoang koalikjang apkas pwa en Koahs poangpoang apel pilpil oang kamwai en wiahla mour poaspoas oau; ma kamwai wia joang oauwe, kamwai nen johkak kerpwihla amwai pwojon.
11 Jangin joanngoauwe, kamwai pirin oaloahdi pwung unjek pwa kamwai en dilda nehn Wei joahsukko en asai Koaun apel Jounkoamoaur Jesus Christ.
12 A doari, ngoahi pirin kasmankihoang kamwai mehpwiai anjoau ohroj, mihndahr ma kamwai ne pwen kidal apel ioar ne poahjoankihda soang mehlello ma kamwai ne oaloahdi.
13 Ngoah leme pwa pwen ioar pwung oang ngoahi en kamwoakid amwai lamlam oang mehpwiai nehn oaroain oai mour.
14 Ngoahi kidal pwa ngoahi anjoau koaroan kihdi palwar ma pirin mehdi oauwe, doahroar en asai Koaun Jesus Christ ne pwehng ngoahi in janjal.
15 Doari, ngoahi pirin wia uhwen oai kak en kasmankihoang kamwai mehpwiai anjoau ohroj mwerin oai mehdi.
Jounkadehde in Lingin Christ
16 Kamai johpwa poahjoankihda sikesik likamw ki amai padahk kan oang kamwai doahr rojon in indoahn asai Koaun Jesus Christ. Kamai kapangki pein mijamwai kan Ah rojon laplap.
17 Kamai ioar mine wijahu anjoauwo Koahs Jahm kioang Jesus woaun apel klohri, anjoauwo ma ngillo indoahng Jesus jang Klohri Keiou Laplappo, pwahla, “Ioar noai jermwein kajampwalwa men, ma Ngoahi kin ipwilki.”
18 Pein kamai ne rong ngil oauwe indihdo jang nehnloannge, anjoauwo ma kamai minmine Ipoa pohn dol joarwiho.
19 Doari, ioar kamai inenin koapwoarpwoarki en joukohppok padahkko ma ne lohkjili. Pirin mwehu oang kamwai en soahk kanaihoang padahkko, pwa ih doahroar maram oau ma ne kin dakdakar nen ros oaroh rehnpijoang a maram in ujuhn inminjoang ken kamaramihda mohngiongimwaikan.
20 A pohnangin me ohroj, saman pwa joh emen in kisai kak pein kawoahwoa kokohp oau nehn Puk Joaroawi.
21 Pwa joh pak oau padahk kokohpda kin indoa jang injenen armaj, a armaj ioar mine pehn manman in Ngen Joaroawi nehn irai kin sikoa padahkko ma indoa jang Koahs.