5
Pwihnin Jihpw in Koahs
1 Ngoahi, ma pein ngoahi wia emen koaun nehn mwomwohdjo, wia poakpoak ngidngid oang irai koaun kan nehn pwungamwai kan. Ngoahi ioar emen jounkadehde en Christ koaloklok kan, a ngoahi pirin pwili anki klohri ma pirin janjalda. Ngoahi poakpoak ngidngid oang kamwai
2 en wia jilepen jihpw ma Koahs ne kioang kamwai apel peren apwali mwehuwi irai, doahroar Koahs mwehuki kamwai en wia; a jaudi wia in koaulim. Wia amwai doadoahk, jaudi oang oaloa dopdop, a pwa jang in inoang in papah mehlel.
3 Johpwa jong in koaunda iraihok ma ne liklikoang kamwai en pwukoahki apwali, a kamwai en wia sohn kahlmoang mwehu oang pwihn in jihppwok.
4 A anjoauwo Jilepen Jihpw Laplappo pwokdo, kamwai pirin oaloa pwoahu in klohriho ma nen johkak joaloangla pein ah maram.
5 Pel doahroar kamwai armaj pwulopwul kan kamwai anahne peikkoang irai amwai koaun kan. A ohroj kamwai anahne likkoaukihda likkoaun poarpoar in aksiksik, in papah emen emen; Puk Joaroawi pwa “Koahs kin uhwoang irai ma aklaplap kan, a Ih kin kupwurki irai ma aksiksik kan.”
6 Doari, kamwai pein aksiksikla pehn manman in poahn Koahs pwa Ih pirin pwoakda kamwai nehn pein Ah anjoau mwehu.
7 Kioang Ih amwai kapwunod kan ohroj, pwa Ih kajampwalki kamwai.
8 Soahk wija, mwajmwajahn! Amwai imwinsihsi, Jehsen, kin pidekjili doahr laian men rahrahu, raprapahki inje ih en johploahdi.
9 Kamwai soang nehn amwai pwojon apel pallan Jehsen, pwa kamwai kidal pwa wija ohroj nehn jampah epwi joauloang pwili kamwai poahm joangoan loklokkohr.
10 A mwerin amwai ne loklok oaroain anjoau kij, Koahs in kalahngan ohroj, ma kin pangin kamwai en pwili anki Ah klohri poaspoas nehn amwai oauwoang Christ, pirin pein Ih kaunjekihla kamwai apel kioang kamwai en soang, sihkei, apel anki poahjoan mehlello.
11 Oang Ih ioar manmanno ma joh imwin! Amen.
Koarjoahklahn Rahnmwahu
12 Ngoahi insingkihwehng kamwai kijilikoau mwosmwos oauwe ki jauwaj in Silas, ma ngoahi kin wiahki ih doahroar rioai loalpwoas men. Ngoah nimen kangoange kamwai apel kioang kamwai pein oai kadehde pwa me ioar uhdahn kalahngan in Koahs. Uhda soangdi oang nehn kalahngan oauwe.
13 Riamwai mwomwohdjo nehn Babylon, ma ne pel pilpilda jang Koahs, kin kadar oang kamwai arai rahnmwahu, apel doahr noai jermweinno Mark.
14 Rahnmwahuwi emen emen ki misik in limpoak in joauloang.
Mweidoahng moaloailoai en mine ipamwai ohroj ma kijehn Christ.