4
Mour Wilialihda
1 Nehn en Christ ne loklok in palwar, kamwai pel anahne kasihkei pein kamwai ki joangoan lamlammo ma Ih anki; pwa inje in kamwai ma kin koaloklok in palwar ioar ne johla dihp.
2 Doari, jang apkas inla, kamwai anahne mourki mour ma koaunkihda kupwuren Koahs, a jaudi injenen armaj, nehn luhwen amwai anjoau pohn jampahioauwe.
3 Ne isar anjoau nehn amwai mour in mehj nehn amwai wihwia da ma irai rosros kan mwehuki wia. Amwai mour minehla nehn siahk in nenek, inoang juwed, jakjakau, kamkamdipw apel wia siahk jamin in pwongi kohs likamw kan.
4 A apkas, ioar irai rosros kan ne pwuriamweikihla amwai ne johla pasoahng irai nehn joangoan mour inenin joah injino; a doari, irai ken koauwe kamwai.
5 A irai uhdahn kadehde pein irai oang Koahs, ma ioar ne onopdahng kadeik irai ma mour apel mehdi.
6 Ioar kahrpoahwa Rongmwehuwo ne kalohkjili pel lel oang iraihok ma ne mehdi, oang iraihok ma ne kadeikda anjoauwo irai mour pohn jampah doahroar armaj ohroj kin kadeikda. Rongmwehuwo ne padahkjili oang irai pwa nehn arai mour pali ngen, irai en mour doahroar en Koahs mour.
Jounkohwa Mwehu in en Koahs Kijakijjok
7 Imwin me ohroj ne koaroando. Kamwai anahne pwen pein koaunda kamwai apel onnonop pwa kamwai en kak kapkap.
8 Pohnangin me ohroj, ngidngidki amwai ipwilki emen emen, pwa ipwil kin pwaindi dihp dir.
9 Risingda umwamwai kan oang emen emen nehn joh koaulim.
10 Emenemen kamwai, nehn ah wia jounkohwa mwehu in en Koahs kijakij sohrohr kan, anahne doadoahkki kijakij kajampwal kan ih ne oaloahdi jang Koahs oang kamwahu oang epwi armaj sohrohr.
11 Irai ma padahk anahne padahkki Mahjan en Koahs; irai ma papah anahne papah ki sihkeiho ma Koahs kin kioang irai, pwa nehn joang ohroj, kaping en inlahng Koahs in oadoan Jesus Christ, ma ioar koanoahng oaloa klohri apel manman jang apkas inla. Amen.
Oaloa loklok doahr Joauloang men
12 Oai pirien kan, johpwa pwuriamweiki jongjong moadoak kan ma kamwai kin loklokki, mwomwen pwa mehkij johkin wiawi ne wiawihoang kamwai.
13 A kamwai en perenki pwa kamwai pwili anki en Christ loklok kan, pwa kamwai en kak dirkihla peren anjoauwo ma Ah klohri pirin janjalda.
14 Meid pai kamwai ma kin oaloa lal kamoadoak ki oadoan Christ; joanngoauwe woahwoahki pwa Ngenin Klohriho, Ngenin Koahs, ioar ne mine pohmwaikan.
15 Ma kamwai loklok, jaudi pwa jangin amwai wia joun kojkoj armaj ke jounpirap ke lollap ke joun kasiamau.
16 A joah, ma kamwai loklok pwa kamwai ioar joauloang, johpwa mehkki; a kapinga Koahs pwa kamwai ne pwili adanki oadoan Christ.
17 Anjoaun kadeik en sapda ne leldo, a pein nihn Koahs armaj ioar pirin sapin kadeikda. Ma kadeik sapda ipasai, a imdoahr imwlahn iraihok ma johpwa kamehlele Rongmwehuwo jang Koahs?
18 Doahr Puk Joaroawi pwa,
“Inenin apwal oang armaj pwung en koamoaurla;
a doari, da pirin wiawihoang armaj dipannok ma joh ahr pwojon?”
19 Doari, iraihok ma loklok pwa ioar kupwuren Koahs oang irai, irai koanoahng, jangin arai wihwia mwehu kan, likihoang unjek pein irai oang Ih ma kapikda irai, Ih ma anjoau ohroj kin kolkol Ah inoau.