3
Li Pwoapwoaud apel Woal Pwoapwoaud kan
1 Pel doahroar kamwai li pwoapwoaud kan en mweidla pein kamwai oang pahioamwai kan, pwa ma mine emen in irai johpwa kamehlele Mahjan in Koahs, amwai wihwia pirin wiahng irai en kamehlele. Nen johpwa koanoahng kamwai en pwa mehkij,
2 pwa irai pirin kapang uhwen mwakelkel apel woaun in amwai wihwia kan.
3 Kamwai joah koanoahng doadoahkki kapwas in palwar pwa en kalingihla pein kamwai, ma doahroar mwomwen amwai piroakroakihda pisen moangoamwai, ke mwarmwar sakai kajampwal apel siasi kohl, ke likkoau kan ma kamwai kin likkoauki.
4 A amwai ling koanoahng pid amwai mehlel oang pein kamwai, ling in ngenno ma kin poaspoas ma kadek apel moaloailoai, ma ioar keiou kajampwal mwohn Koahs.
5 Pwa lihn mehjwa nehn irai joaroawi ma kin koapwoarpwoarki Koahs kin kalingihla pein irai nehn irai kin mweidoahng arai koajoandi oang pahioarai kan.
6 Sarah ioar wia joanngoauwo; ih peikkoang Abraham nehn ah panginki Abraham ah koaun. Apkas, kamwai ioar nah jerpein koa ma kamwai mour mwehu apel johpwa mijik mehkij.
7 Pel doahroar kamwai woal pwoapwoaud kan anahne mour oang pahioamwai kan ki woahwoahioau ma en janjal pwa irai li kan jasihkei jang kamwai. Apwali irai ki woaun pwa irai pirin pel pwili kamwai oaloa en Koahs kijakij in mour. Wia joanngoauwe pwa en joah wiahng amwai kapkap kan en joah pwoaida.
Loklokki Wia me Pwung
8 In imwlahn: kamwai ohroj anahne anki joangoan mwoakid oauwoar apel joangoan lamlam oauwoar; ipwilki emenemen, apel kadek, aksiksik oang emenemen.
9 Kamwai joah dupukki me nauna oang me nauna, ke lal nauna oang lal nauna; a dupukki kapai oang me nauna, pwa kapai ioar ma Koahs ne inoauki Ih en kioang kamwai nehn Ah ne pangin kamwai.
10 Doahr Puk Joaroawi pwa,
“Ma koawoa nimen injenmwahuki mour
apel kajik anjoau mwehu kan,
koawoa anahne kalkehjang koawoa lallal nauna,
apel sukdihjang siksikoa me likamw,
11 Koawoa uhdahn anahne mweijang me nauna, a wia me mwehu,
koawoa anahne engdehn oang moaloailoai ki oamw mohngiong unjek.
12 Pwa Koaunno kin kapang irai pwung kan,
apel kin rong arai kapkap kan;
a Ih uhwoang irai kan ma wia nauna.”
13 Inje kak koauwe kamwai ma kamwai kin ngoangkihoar wia da ma mwehu?
14 A mihndahr ma kamwai koanoahng loklokki wihwia da ma mwehu, ia uhwen amwai peren! Johpwa mijik emen armaj, apel johpwa pwunod.
15 A kamwai anki wahu oang Christ nehn amwai mohngiong kan, apel woaunki pwa Ih amwai Koaun. Onopda anjoau ohroj pwa kamwai en kak japoang irai kan ma poaki ipamwai kamwai en kawoahwoa koapwoarpwoarro ma kamwai anki,
16 a kamwai kawoahwoa in moaloailoai apel woaun. Kolkol mwakelkel amwai lamlam, pwa nehn anjoauwo ma armaj koauwe kamwai, a irai ma koauwe kamwai, ma sikoa me nauna in amwai mwoakid mwehu kan oang idawen Christ, pirin jarohkihdi da irai sikoa.
17 Pwa ma ioar mehkij mwehu loklokki wihwia mwehu, ma ioar koanoahng kupwuren Koahs, jang loklokki wihwia nauna.
18 Pwa Christ ne mehkihdi dihp pehn oauwoar doari, woal mwehu men wiliandi armaj dipan ohroj, pwa en kahlwahdo kamwai ipen Koahs. Christ ne wiawihoang en mehdi in palwar, a ne mour in pali ngen,
19 apel nehn Ah wia ngenla, Ih kin indihla padahk oang irai ngen joaldi kan.
20 Ngen joaldi pwiai ioar ngenin iraihok ma johkin peikkoang Koahs nehn Ah kanangmah joujou nehn rehnnok ma Noah wihwia warihmmwo. Irai jipid pwi nehn warihmmwo — walmen oar — ioar piskihla pillo,
21 ma ioar wia kilel kajampwal oau oang poapdaij, ma apkas ne kamourihla kamwai. Poapdaij jaudihoar duhpjang pwirej in palwar, a inoau oau wiawihoang Koahs jang lamlam mwehu. Poapdaij kamourihla kamwai ki iejdahn Jesus Christ,
22 ma ne indahla nehnloannge apel ioar ne mine loap moaun in Koahs, ne koaunda sohnloang ohroj apel irai koaun kan apel manman kan nehnloannge.