2
Sakai Mour apel Wei Joaroawi
1 Kihwehjang kamwai joangoan nauna ohroj, likamw, mwalaun, luwak apel lalin koauwehk kan.
2 En doahroarla jeri pwelel kan, ma kin maroauki pilen dihdi mehlel in pali ngen pwa kamwai en koapkihda apel mourkihla.
3 Puk Joarwiho kin pwa, “Kamwai ne namda ia uhwen mwehu in kalahngan in Koaunno.”
4 Indoa ipen Koaunno, pwa ioar Ih sakai mourwa ma armaj kan ne kerpwihla, a Ih ne pilpilda apel ne kajampwalla ipen Koahs.
5 Indoa doahroar sakai mour pwi apel mweidla pein kamwai en wia Umw Joaroawi oau, ma Ngen Joaroawi koukoukoukihda, wija ma kamwai pirin wia pwihn in jamwrou oau ma kin kihdahng Koahs meiroang in pali ngen ma pwung oang kupwuren Koahs in oadoan Jesus Christ.
6 Pwa Puk Joaroawi pwa,
“Ngoahi ne pilda sakai kajampwal oau,
ma Ngoahi kihdihoang en wia sakain pwukoakoaimw nehn Zion;
pwa inje ma pirin pwojon Ih, jehpirin mehkda.”
7 Sakai oauwe ma inenin kajampwal oang kamwai kan ma kin pwojon; a oang irai ma joh ahr pwojon:
“Sakaiho ma jounkou umw kan ne kerpwihla,
wud wiahla sakain pwukoakoaimw.”
8 Pel oau iren Puk Joaroawi kin pwa,
“Sakai oauwe ioar sakaiwa ma armaj kan darpingkihjili,
ioar sakaiwa ma pirin kapkihla irai.”
Irai darpingki pwa irai johpwa pwojon Mahjanno; ioar doahr me kupwuren Koahs oang irai.
9 A kamwai wia kainek pilpil oau, pwihn jamwrouhn Nahmwarkiho, kamwai wia wei joaroawi oau, nihn Koahs armaj pwi, ma pilpildahng kalohkihjili wihwia kapwuriamwei kan en Koahs, ma pangindo kamwai jang nehn ros oang nehn Ah maram linngo.
10 Anjoau kij mwowoa kamwai jaudi nihn Koahs, a apkas kamwai ne wiahla uhdahn nihn Nah. Anjoau kij mwowoa kamwai johpwa kidal mahk in Koahs, a apkas kamwai ne oaloa Ah mahk.
Nihn Koahs Lidu kan
11 Oai pirien kan, ngoah kangoangehki kamwai in doahr mihn likin pwi apel mihn keiruhn nehn jampah oauwe! Kamwai mweijang inoang kan in pali uduk, ma kin pallan ngenimwai kan.
12 Amwai siahk kan nehn pwungen armaj rosros kan en kin mwehu, pwa nehn irai pirin kinehioang kamwai likamw, pwa kamwai armaj nauna pwi, a irai en kapang amwai wihwia mwehu kan, doari irai en kapngahki Koahs nehn Rehnno Ih pirin indoa.
13 Ki Koaunno kamwai peikkoang armaj ohroj ma anki manman in koaunda wija; oang nahmwarki laplappo, ma anki manman unjek in wei pokon,
14 apel oang koapina kan, ma kin koadoaddoardo jang ipen nahmwarkiho pwa irai en kin koapwungla armaj nauna kan apel kapnga irai ma wihwia mwehu kan.
15 Pwa Koahs mwehuki kamwai en kauhdi sikesik naunahn armaj pweipwei kan ki amwai wihwia mwehu kan.
16 Kamwai en mour doahroar armaj jaldek pwi; a en joah doadoahkki amwai jaldek en wia mihn pwaindi mehkij ma nauna, a en mour doahroar lidu in Koahs pwi.
17 Woaunki armaj ohroj, ipwilki riamwai joauloang kan, mijik Koahs apel woaunki nahmwarki laplappo.
Kajalpen en Christ Loklok
18 Kamwai lidu kan, kamwai uhpa amwai joumaj kan apel kajalehng irai amwai woaunki irai in mehlel; a jaudi ioarroar oang irai ma kadek apel lamlam mwehu kan, pwa pel oang irai kan ma kin lemei.
19 Koahs pirin kapaiahda kamwai ki me, ma kamwai pirin kanangmahng loklok joah koanoahng kan, pwa kamwai woahwoahki kupwuren Koahs.
20 Ma kamwai kin kanangmahng pokpok ma aluhwoang amwai japwung kan, inje ma pirin kapnga kamwai? A ma kamwai kin kanangmahng loklok nehn amwai kin wiahda mehkij mwehu, Koahs uhdahn pirin kapaiahda kamwai.
21 Pwa ioar oang joanngoauwe ma Koahs ne panginki kamwai, pwa pein Christ ne koaloklokki kamwai apel kihdihoang kamwai karajpoa mwehu oau pwa kamwai en kak pwili wud nehn lipwen ehn.
22 Ih johpwa wiahda dihp oau, apel johpwa emen kin rong jang likamw oau nehn oawoa.
23 Nehn armaj kan kin lahlahwe Ih, Ih johpwa dupukkoang irai; nehn Ah loklok, Ih johpwa lioaskihoang; a Ih mweidoahng Ah koapwoarpwoar ipen Koahs Jounkoapwung Pwung.
24 Pein Christ wahda dipasai kan nehn palwoaroa oang pohn lohpwuhwo, pwa kisai en mehdi oang dihp apel mourki mour pwung. Ioar Ah ohla kan ma kemwehuwihla kamwai.
25 Pwa mwowoa kamwai doahr jihpw ma ne joaloangla, a apkas kamwai ne kajpahlihekdohng Ipoa ma ioar Jilepen Jihpw apel Jounapwali ngenimwai kan.