Kijilikoau Keiou jang
Peter
Oarlap
Kijilikoau oauwe jang Peter insingda oang joauloang kan, ma ih panginki “nihn Koahs armaj pilpil kan,” ma mwoarpijoang koaujoanjili paliepeng in Asia Siksik. Kahrpoan keiou in kijilikoau oauwe ioar en kangoangehki irai, sohn wadek kijilikoau oauwe, ma minehla nehn koaloklok apel apwal ki arai pwojon. Peter, emen wahnpoaroan in Jesus Christ, wia me, nehn ah kaskasmanki irai Rongmwehu in Jesus Christ, pwa Ah mehdi, iejda, apel inoau in japahldo kioang irai koapwoarpwoar. Jangin joanngoauwe, irai en oaloahda apel kanangmahng arai loklok; koapwoarpwoar pwa da wiawihoang irai wia mihn kajawi mehlel in arai pwojon apel pwa irai pirin kapaida “nehn Rehnno ma Jesus Christ janjalda.”
Pasoahng ah kangoang kan nehn anjoaun apwal, Peter kangoange nah sohn wadek kijilikoau oauwe en mourki mour oau ma doahroar armaj kan ma kijehn Christ.
Audoapoan Kijilikoau
Sapin kijilikoau 1:1-2
Kasman in en Koahs koamoaur 1:3-12
Poanoau sihkei oang mour joaroawi 1:13—2:10
En joauloang men ah pwukoa kan nehn anjoau in loklok 2:11—4:19
En joauloang impahi apel papah 5:1-11
Kadoariheklahn kijilikoau 5:12-14
1
1 Jang Peter, wahnpoaroan in Jesus Christ —
Oang nihn Koahs armaj pilpil kan, ma kaujang wijahn koaloklok koaujoanjili doahr mihn likin pwi, nehn wein Pontus, Galatia, Cappadocia, Asia apel Bithynia.
2 Kamwai ne pilpilda in doahr koajoandihn Koahs Jahm apel kamwai ne wiahla pwihn in armaj joaroawi oau jangin Ngenin Koahs, pwa kamwai en peikkoang Jesus Christ apel mwakelkelkihda Ah insahu.
Kalahngan apel popohl en unjekla mehlel ipamwai.
Koapwoarpwoar mour oau
3 Mweidoahng pwa kisai en kapingkalahngan oang Koahs ma pel ioar Jemen asai Koaun Jesus Christ! Jangin koalik in Ah kalahngan, Ih ne kioang kisai mour kapw nehn Ah kaiejda Jesus Christ jang mehdi. Joanngoauwe audohkihda kisai koapwoarpwoar mour oau,
4 a doari, kisai kajik kisai en anki kapai koalik kan ma Koahs neknekid oang Nah armaj kan. Ih kolkol kapaihok oang kamwai nehn loannge, wijahu ma kapai kan johkak mwoarpijoang, ohla, ke johrla.
5 Kapaihok ioar oang kamwai, ma jangin pwojon ah ne jilajildi ki manman in Koahs oang koamoaurro ma ne koaunopdahng en janjalda nehn imwin anjoau.
6 Kamwai perperen ki joanngoauwe, mihndahr ma anjoaukije pwen koanoahng kamwai en injinjuwed oaroain anjoau kij jangin joangjoangoan apwal dir kan ma kamwai kin loklokki.
7 Kahrpoan apwallok ioar en kadehdehda pwa amwai pwojon pwen mehlel. Pel doahroar kohl, ma kin kak koauwehkla, kin pel jongjongki oai; a ioar amwai pwojon, ma inenin kajampwal jang kohl, anahne pel jongjongki oai, pwa en kak woaroai. Ioar anjoauwo kamwai pirin oaloahdi kaping, klohri, apel wahu nehn Rehnno ma Jesus Christ pirin janjalda.
8 Kamwai ipwilki Ih, mihndahr ma kamwai kahjik kapang Ih; apel kamwai kamehlele Ih, mihndahr ma kamwai johpwa kapang Ih apkas. Doari, kamwai kapingki peren koalik apel ling, ma loapin lal johkak kawoahwoahda,
9 pwa kamwai ne oaloa wehn amwai pwojonnen, ioar koamoaurpen ngenimwai kan.
10 Ioar koamoaur oauwe ma kahrehda joukohppok rapahki in koanoainoai apel soahk in pijesik; irai ne kohpda doahr kijakij oauwe ma Koahs pirin kioang kamwai.
11 Irai jong en kidalda ngehd apel mwomwen koamoaur oauwe pirin leldo. Ioar anjoau kije ma Ngenin Christ nehn irai kin kajalehda, nehn kokohp in koaloklokkok ma Christ pirin oaloa apel klohriho ma pirin indoa mwerin.
12 Koahs ne kajalehioang joukohp pwiai pwa arai doadoahk jaudi en mwehu oang pein irai, a pwa oang kamwai, nehn irai ne sikoa joang pwiok ma apkas kamwai ne rong jang jounpakair kan ma ne pakairkihda Rongmwehuwo jangin manman in Ngen Joaroawi kadarekdo jang nehnloannge. Joangpwiai ioar joang koa ma pein sohnloanngok mehr pel nimen woahwoahki.
Poangpoang oau oang Mour Joaroawi
13 A doari, amwai lamlam kan en onop oang doadoahk. Kamwai mwajmwajahn apel koapwoarpwoarkihoar kapai kan ma kamwai pirin oaloa nehn en Jesus Christ pirin pwokdo.
14 Peikkoang Koahs apel joah mweidoahng amwai mour en koaunkihda joangoan inoanngok ma kamwai anki anjoauwo ma kamwai pwen minehr nehn amwai jawoahwoa.
15 A kamwai joarwihla in me ohroj ma kamwai kin wia, pwa Koahs ma pangindo kamwai en joarwihla doahroar Ih ma joaroawi.
16 Puk Joarwiho pwa, “Kamwai en joaroawi pwa Ngoahi ioar Joaroawi.”
17 Kamwai panginki Ih Jamamai anjoauwo ma kamwai kin kapkap oang Koahs, ma kin kadeikihda armaj ohroj ki joangoan mihn jong oauwoar, in doahr ma koanoahng en emenemen ah wihwia kan. Doari, mourki mour in woaunki Koahs nehn luhwen amwai anjoau pohn jampahioauwe.
18 Pwa kamwai kidal da ne dopdopla pwa en kajaldekihla kamwai jang joangoan mour joh kaspoa ma kamwai johjohki jang amwai pahpa koalikkok. Joanngoauwo johpwa wia mehkij ma kak koauwehkla, ma doahroar silper ke kohl;
19 Pwa meiroang koalik dupkoahioau, ioar meiroang in insahn Christ, ma doahroar jihpw men ma joh ah jamin ke japwung.
20 Ih ioar ne pilpilda jang Koahs mwohn kapikpikdahn jampah apel ioar ne janjalda nehn rehn in mwuhr pwiai ki kamwai.
21 Christ ioar kahrehda kamwai pwojon Koahs, ma kaiejda Ih jang mehdi apel kioang Ih klohri; a doari, ioar kahrehda amwai pwojon apel koapwoarpwoar en uhlahng oar Koahs.
22 Apkas, jangin amwai peikkoang me mehlello, kamwai ne kamwkelehda pein kamwai apel ne ankihpene ipwil mehlel oau oang emen emen, kamwai ngidngidki ipwilpene ki amwai mohngiong unjek.
23 Pwa jang in Mahjan mour apel joahsuk ma jang Koahs, kamwai ne noaisikdi japahl doahroar amwai wia jerihn jahm men ma johkak mehdi, a jaudi jahm men ma kak mehdi.
24 Doahroar Puk Joaroawi pwa,
“Armaj ohroj doahroar dipwdipw,
ahr ling ohroj doahroar rohs in nehn japw kan.
Dipwdipw kan kin mengla, apel rohs kan kin mwoardihjang,
25 a Mahjan in Koaunno kin poaspoas allaluhlahr.”
Mahjan oauwe ioar Rongmwehuwo ne kalohkihoang kamwai.