5
Keper oang Irai ma Koapwoahpwoa kan
1 A apkas, kamwai armaj koapwoahpwoa kan, rong ngoahi! Joang koalik apel joang rahrahu ki paijuwed kan ma pirin lel pohmwaikan.
2 Amwai koapwoahpwoa kan ne mwoajoangosla, apel woahd ne kangla amwai likkoau kan.
3 Nihmwai kohl apel silper kan ne kidkidkihla insahn pahrang, ma pirin wia mihn kadehdehioau pid kamwai, ma pirin pel kangla palwoaroamwai kan doahroar oai. Kamwai ne koajokpene koapwoa nehn rehn in mwuhr kai.
4 Kamwai johpwa kioang dupkoan sohn doadoahk kan ma kin kini amwai mwoaswel kan. Rong arai koaulim kan! Ngilen arai joang irai kan ma rikpene wehn japwamwai kan ne lellahng sien Koaunno, Wija Laplappo.
5 Amwai mour nehn jampah ne pwen dirkihla injenmwahu apel peren. Kamwai kamwingehda palwoaroamwai kan pwa en kirihjla doahr mahn moad ma pirin kojkojdi.
6 Kamwai ne kadeikda apel ne kojukdi armaj kan ma mour pwung ipen Koahs, a irai johkin pallan kamwai.
Kanangmah apel Kapkap
7 Doari, rioai kan, kamwai kanangmah oaroh Koaunno indoa. Kapang doahr kanangmah in jounmwoaswel kan ahr kin joujowi japwaraihok en uhwa wehn mwoaswel mwehu kan. Irai kin kanangmah jowi wud in mijen pahr apel imwin pahr.
8 Kamwai anahne kanangmah. Kolkol amwai koapwoarpwoar koalik, pwa rehn in en Koaunno indoa ne koaroan.
9 Rioai kan, joah koaulim, uhwoang emen emen, pwa kamwai en joah kadeikda. Jounkoapwunngo ne koaroando, onopdahng pwokda.
10 Rioai kan, saman joukohppok ma padahk in oadoan Koaunno. Wiahki irai amwai sohn kahlmoangi arai kanangmah soang nehn anjoaun loklok.
11 Kisai kin wadekki pwa irai peren pwa irai kanangmah. Kamwai ne rong en Job kanangmah, apel kamwai kidal doahroar en Koaunno jeuwejehla ih mwuhr. Pwa Koaunno ioar dirin kalahngan apel kadek.
12 Rioai kan, pohnangin me ohroj, johpwa kahula. Johpwa kahukihla nehnloannge ke jampah ke mehkij joah lipilpil. Ioarroar pwa “eh” ma eh, apel “joah” ma joah; doari, kamwai jehpirin lohdihoang pehn kadeik in Koahs.
13 Mine emen nehn pwungamwai kan mine nehn apwal? Irai koanoahng kapkap. Mine emen nehn pwungamwai kan peren? Irai koanoahng koaulki koaul in kaping.
14 Mine emen nehn pwungamwai kan johmwehu? Irai koanoahng iloaklahng irai mah in nehn mwomwohdjo kan, ma pirin kapkapki irai apel salipki irai lehn olip in oadoan Koaunno.
15 Kapkap oauwe en wiawi in pwojon pirin kemwehuwihla johmwehu men; Koaunno pirin kasihkeida irai, apel dihp ok irai ne wiahda pirin pel mahkla.
16 A doari, woahkda dipamwai kan oang emen emen apel kapkapki emen emen, pwa kamwai en mwehula. Kapkap in armaj pwung men kin inenin manman.
17 Elijah armaj men doahroar kisai, ih kin kapkap ngidngidki pwa en johla wud; joh wud mwoardi pohn jappwo oaroain johnpar jiluh oaloap.
18 Ih pel pwuroahng kapkap, pehnloannge ken kamwroahdi wud, japw kan ken kapwokihda wah kan.
19 Rioai kan, ma mine emen ipamwai ma wesjang padahk mehlello, a emen kajpahlihdo ih,
20 kamwai samsaman me: emen ma pirin kajpahlihdo armaj dipan men jang al japwunngo pirin koamoaurla ngenin armaj dipan meno jang mehdi, apel ih pirin kahrehda mahklahn dihp dihrdir.