4
Koampoakpen Jampah
1 Ia wija pei apel akmai ohroj nehn pwungamwai kan injang? Pei apel akmai ohroj injang amwai inoang in kainjenmwahu, ma ioar kin peipene anjoau ohroj nehn palwoaroamwai kan.
2 Kamwai mwehuki mehkan, a kamwai johkak anki; doari, kamwai ken onopdahng kojkoj. Kamwai inenin noarkoa mehkan; a kamwai johkak anki; doari, kamwai akmai apel pei. Kamwai johpwa anki mehkan kamwai mwehuki pwa kamwai johpwa poaki Koahs.
3 Nehn amwai poaki, kamwai johpwa oaloa pwa amwai lamlam kan nauna; kamwai poakihoar mehkan en doadoahk oang kainjenmwahuwi kamwai.
4 Kamwai doahroar armaj in kamwkamwahl pwi! Kamwai johpwa kidal pwa ma emen wia koampoakpen jampahioauwe woahwoahki ih wia imwinsihsihn Koahs? Ma kamwai nimen wia koampoakpen jampah, kamwai wiahkihla pein kamwai imwinsihsihn Koahs.
5 Johpwa lemleme pwa joh mehlel in lal in Puk Joarwiho ma pwa, “Ngenno ma Koahs kioang kisai ioar audohdkihda inoang sihkei.”
6 A kalahnganno ma Koahs kin kihdoa ioar kapwa sihkei jang. Doahroar en Puk Joaroawi kin pwa,
“Koahs kin pallanda armaj aklaplap,
a Ih kin kioang kalahngan oang irai ma aksiksik kan.”
7 A doari, mweidoahng kamwai Koahs. Pallanda Jehsen, a ih pirin kaujang kamwai.
8 Indoa koaroandohng Koahs, a Ih pirin indoa koaroandohng kamwai. Kamwkelehda poahmwai kan, kamwai armaj dipan kan! Kaminihla mohngiongimwai kan, kamwai armaj mwalaun kan!
9 Injinjuwedla, joang, apel joang rahrahu; ukudla amwai uruhr oang joang, amwai malau oang pahsoau!
10 Kamwai aksiksikla mwohn Koaunno, a Ih pirin pwoakda kamwai.
Kalke Kadkadeik Emen Emen
11 Rioai kan, johpwa lipahnede emen emen. Ma koah lipahnede ke kadeik emen joauloang, koah koauwe apel kadeik Kojonneddo. Ma koah kadeik Kojonneddo, a doari koah ne johla wia emen ma kin kapwaihahda Kojonneddo, a emen ma kin kadeik Kojonneddo.
12 Koahs kalahpwuk Jounwiahda Kojonned apel Jounkoapwung. Ih ioar doari kak koamoaurla apel koauwehla. Inje koawoa lemehkihoang koawoa, en kak kadeik emen sohrohr?
Kalke Juwei
13 Apkas, rong ngoahi; kamwai ma pwa, “Rehnnoauwe ke lakapw kamai pirin jeiloaklahng kahnihmw oau, wijahu ma kamai pirin koaujoan oaroain johnpar oau a kamai sapda wia doadoahk in noasnoas apel wiahda dirin mwani.”
14 Kamwai pwen jehjoa pwa ia pirin audoapoan amwai mour lakapw! Kamwai ioar doahroar soahkoi, ma pwokda anjoau mwosmwos kij, a doari pel joaloangla.
15 Da kamwai koanoahng pwa ioar me: “Ma Koaunno kupwurki, kamai pirin mour apel wia joanngoauwe ke joanngoauwo.”
16 A apkas, kamwai pwanah aklaplap, apel kamwai juwei; joang pwiai ohroj japwung.
17 Doari, ma kisai johpwa wia joang mwehuwo ma kisai kidal pwa kisai koanoahng wia, kisai ne dipda.