3
Loawoa
1 Rioai kan, en joah dir nehn pwungamwai kan koanoahng wiahla jounpadahk. Pwa kamwai kidal, kisai jounpadahk pirin oaloa kadeik koalik jang kadeik in epwi.
2 Kisai ohroj kin kalap japwungla. A ma armaj men johkin wiahda japwung nehn ah sikesik, ih unjek apel kak koaunda palwoaroa pwon.
3 Kisai kin kioang pahrang siksik kij nehn oawoan oahs men, wiahng pwa en peikkoang kisai apel kisai en kak wiahng en inla wijahu ma kisai mwehuki.
4 Ke lemehla jip oau, uhwen ah koalik apel eng sihkei kin kailjili, ilihl sihksik oau ioar kin kail, doari jippo ken kijoula wijahu ma kepdenno mwehuki ih en kijouwoang.
5 Ioar pel doahroar loawoan armaj: uhwen ah siksik, kin kak juweiki joang koalik kan.
Lemehla, oai sihksik kij kak jirepihda nehn woallo koalikkoau.
6 Apel loawoan armaj ioar doahr oai oau. Ih wia wei in japwung oau, audohla dohiahu nehn palwoaroasai kai apel kadoauihpijoang nauna nehn palwoaroasai kai unjek. Ih akanda oai oau nehn asai mour unjek ki oai oau ma indoahng ih jang nehn ehl.
7 Kisai armaj ioar kak kamaidi apel ne kamaidihla joangoan mahn ohroj — mahn ingkel kan apel mahnsang kan, mahn karak kan apel mwumw kan.
8 A kahjik emen armaj ne kak kamaidi loawoan armaj. Loawoan armaj nauna apel koasihwo, dirin pwoaisin ma kak kojkoj.
9 Kisai doadoahkki loawoasaikai en kajpahl kalahngan oang asai Koaun apel Jamasai; apel doadoahkki loawoasaikai en kariahla armaj ma kapikpikda in mwomwen Koahs.
10 Lal in kajpahlkalahngan apel karia kan indoahjang nehn au oauwoar. Rioai kan, joang oauwe koanoahng en joah wiawi!
11 Joh sapin pil kin kakoarihwe pil mum apel pil kasik jang nehn koarkoar oauwoar.
12 Rioai kan, suhkoa fig oau johkak uhwa wehn olip; a suhkoahn wain johkak uhwa wehn fig, ioar pel doahroar pwarer pilen jed oau johkak wiahda pil mum.
Erpis Jang Puwoa
13 Mine emen nehn pwungamwai kan ma erpis apel anki woahwoa? Kamwai en kadehdehda jangin in amwai mour mwehu apel jangin amwai wihwia mwehu ma janjal in aksiksik apel erpis.
14 A ma nehn amwai mohngiong kamwai luwak, pihrin, apel roprop oang pein kamwai, kamwai joah wiahda dihp uhwoangda me mehlello nehn amwai kin juweiki amwai erpis.
15 Joangoan erpis oauwe johkin indihdohjang nehnloannge, pwa ih wia kijehn jampah, ih johpwa kijehn pali ngen, a ih wia kijehn ngen juwed.
16 Pwa wija ma pihrin apel luwak kin mine, ioar wijahu ma pingping apel joangoan nauna ohroj kin mine.
17 A erpis jang puwoa ioar mwakelkel mwohn me ohroj; ih pel moaloailoai, impahi, kadek; ih pel audohdki kalahngan apel wiahda wehn doadoahk mwehu; erpis johkin mwalaun apel lipilpilki armaj.
18 A pwung ioar wehn doadoahk ma wiawihda jang liporrohk ma sohn kamoaloailoai kan poadokdi nehn popohl.