2
Joah Lipilpilki Armaj
1 Rioai kan, pwa amwai pwojon asai Koaun Jesus Christ ma Koaun Klohri, kamwai joah lipilpilki armaj kan.
2 Ma woal koapwoahpwoa men ma kapwaski rihng kohl apel likkoauki likkoau mwehu pirin dilda pwa en pwili amwai kaudek, apel emen ma joamwoahmwoa ma likkoauki likkoau mering pel pwili dilda,
3 ma kamwai pirin woaunki woal koapwoahpwoahu a pwehng ih, “Mwindi me pohn jeia mwehu oauwe,” a pwehng woal joamwoahmwoahu, “Uhda pwurlahu, ke mwindi pohn pilowarre ipen ehihoa,”
4 doar, kamwai ne kasohrohrihpijoang kamwai a wia koapwung oau ma poahjoankihda lamlam nauna.
5 Rioai kajampwalkan, kamwai rong! Jaudi Koahs ne pilda ihr ma joamwoahmwoa kan in jampahioauwe en koapwoahpwoahki ahr pwojon apel johjohki Weiho ma Ih ne inoaukihoang irai kan ma kin ipwilki ih?
6 Kamwai kin mwamwahlki armaj joamwoahmwoa kan! Pwa inje ma kin kioang kamwai kahpwal a panglahng kamwai in mwoalen koapwung kan? Jaudi irai ma koapwoahpwoa kan?
7 Ioar irai ma kin lahlahwe admwehu in Christ, ma nainki kamwai.
8 Kamwai pirin wihwia da ma pwung, ma kamwai peikkoang kojonned in Weiho, ma ioar janjal nehn Puk Joaroawi, ma pwa, “Ipwilki mihn ipoamw doahroar oamw kin ipwilki pein koawoa.”
9 A ma kamwai pirin lipilpilki armaj pwa jang in mwomwoarai kan, kamwai ne kippoang nehn dihp, apel Kojonneddo kin kadeik kamwai, ma sohn koauwehla kojonned.
10 Emen ma kapwaihahda kojonned ohroj, ma ih koauwehla oau kojonned, ih ne dipkihda koauwehla kojonned ohroj.
11 Ih ma pwa, “Joah kamwahl,” ioar Ih ma pel pwa, “Joah kojkoj armaj.” Mihndahr ma koah joah kamwahl, a koah kojukdi armaj, koah ne koauwehla kojonneddo.
12 Sikesik apel mwoakid doahroar armaj ma pirin kadeikihda kojonneddo, ma ioar kojonned kin kajaldekihla armaj.
13 Pwa Koahs nen johpwa kajalehda mahk nehn anjoauwo Ih kin kadeik armajjo ma johkin anki mahk; a mahk kin kalwehdi kadeik.
Pwojon apel Wihwia
14 Rioai kan! Da kaspoahng armaj men ma ih pwa mine ah pwojon a joh ah wihwia mwehu? Imdoahr joangoan pwojon oauwe, ih nen kak mourkihla?
15 Ma riasai woal ke li joauloang men mine, ma joh ah likkoau, apel joah isar kanah mwinge,
16 da kaspoan amwai pirin pwehng, “Koahs en kapaiahda koawoa! Aluhwe koaroangroang apel mwinge mwehu!” — ma kamwai joah kioang mehkij ma en mourki?
17 Pel doahroar in pwojon: ma pwojonnoar ma mine, a wihwia jehpwili, pwojon mehdi oau.
18 A dapwa emen pirin pwa, “Mine oamw pwojon, a ngoahi mine oai wihwia.” A doar, ioar oai pajpoangwa, “Kajalehioang ngoahi oamw pwojon ma wihwia jehpwili, a ngoahi pirin kajalehioang koawoa oai pwojon jang in oai wihwia kan.”
19 Koah kin kamehlele pwa Koahs emennoar? Mwehu! Ngen nauna kan pel kamehlele, a irai kin roarroarki ahr mijik.
20 Pweipwei men koawoa! Koah nimen kadehde doahroar johkaspoahn pwojon ma wihwia jehpwili?
21 Imdoahr jamasai Abraham ah pwungla ipen Koahs? Jangin ah wihwiahu nehn ah meiroangkihla nah jermwein Isaac pohn pei joarwiho.
22 Koah johkak kapang? Ah pwojon apel ah wihwia kan jauwajpene, pwa ah pwojon ne kaunjekihla ah wihwia kan.
23 Doari, sikesik in Puk Joaroawi pwoaida, ma pwa, “Abraham ne kamehlele Koahs, apel jangin ah pwojon, Koahs mweidoahng ih en pwungla.” Doari, Abraham adankihla en Koahs pirien.
24 Doari, kamwai kapang pwa armaj men kin pwungla ipen Koahs jangin ah wihwia kan, a jaudi jangin ah pwojonnoar doari.
25 Ioar pel doahroar Rahab, lihn noaski palwoaroahu. Ih pwungla ipen Koahs jangin ah wihwia kan, nehn ah kajamwo lipoahrok in Israel kan apel jeuweje ira en kaula, wudla nehn oau al sohrohr.
26 A doari, doahroar palwar oau ma joh ngenno ne mehdi, ioar pel doahroar asai pwojon ma joh wihwia pwili ne mehdi.