Kijilikoau jang
James
Oarlap
Kijilikoau jang James wia loapin padahk pwi mihn jeuwejehda mourin armaj. Ih insing oang “nihn Koahs armaj ohroj ma mwoarpijoang wija ohroj nehn jampah.” Jouninsinngo, James, rien Jesus, kin doadoahkki joangoan mwomwen lal ohroj pwa en kajalehioang armaj ohroj doahroar loalkoang apel kaweidin lamlam apel mourin joauloang. Jangin poapoahm in joauloang men, ih kin lelloang nehn joangoan irair pwi ma doahroar koapwoahpwoa apel joamwoahmwoa, kajongjong, wihwia mwehu, kasohrohri armaj, pwojon apel wihwia kan, doadoahkki loawoa, erpis, akmai, akjuwei apel aksiksik, kajawi emen sohrohr, lehmwsik, kanangmah, apel kapkap.
Kijilikoau kije kapwurihda kajampwal in wihwia kan ma kin pasoahng pwojon in mwoakid kan en mourin joauloang.
Audoapoan Kijilikoau
Sapin kijilikoau 1:1
Pwojon apel erpis 1:2-8
Joamwoahmwoa apel koapwoahpwoa 1:9-11
Jongjong apel kajongjong 1:12-18
Rongrong apel wihwia 1:19-27
Keperin lipilpilki armaj 2:1-13
Pwojon apel wihwia kan 2:14-26
Joauloang men apel loawoa 3:1-18
Joauloang men apel jampah 4:1—5:6
Joangjoangoan padahk pwi 5:7-20
1
1 Jang James, lidu in Koahs apel asai Koaun Jesus Christ —
Oang kainek eijek riauwo ma mwoarpijoang nehn wei kan.
Pwojon apel Erpis
2 Rioai kan, kamwai wiahki amwai peren nehn apwal ohroj kin lel kamwai,
3 pwa kamwai kidal pwa nehn amwai pwojon kin kalwehdi joangoan apwal kan, imwlakoan me ioar amwai kak in kanangmah.
4 Kanaihoang pwa amwai kanangmah en joah japwungla, wa kamwai oaroh lel imwin, pwa kamwai en unjekla mehlel, johpwa anahne mehkij.
5 A ma koah emen ma joh ah erpis, koanoahng koawoa en kapkap oang Koahs, ma pirin kioang koawoa erpis; pwa Koahs kin japan apel kalahngan kihwe oang ohroj.
6 A anjoauwo koawoa kapkap, koawoa anahne kamehlele apel joah peikajal. Emen ma peikajal pirin doahroar no in nehn madauwo ma eng kin kaihl apel ukjili.
7-8 Ma koah wia joangoan armaj doahro, ma johkak wiahda oamw lamlam apel johkak koajoanehdi koawoa nehn me ohroj koawoa wia, koah joah koanoahng leme pwa mine mehkij koah pirin oaloahjang Koaunno.
Joamwoahmwoa apel Koapwoahpwoa
9 Riasai joauloang kan ma joamwoahmwoa en perenki en Koahs pirin kajapwilda irai.
10 A riasai kan ma koapwoahpwoa en pel perenki en Koahs pirin kihdi irai; pwa armaj koapwoahpwoa kan pirin johrla doahroar koakpijoang wehn rohs kan.
11 Joauwo kin dakda apel pwideng apel kin pwidengihla suhkoa kan. Doari, rohs koakdihkan pirin mwoardi; apel ahr ling pirin johrjang. Pel doahr armaj koapwoahpwoahkan, irai pirin ohla nehn ahr pirin kadkadiroapwki arai doadoahk kan.
Jongjong apel Kajongjong
12 Meid pai armaj ma kin loalpwoas nehn apwal ma kin lel ih, pwa mwerin ah nen kalwehdi jongjong oauwe, ih nen oaloa kijakijjoau; mour oau Koahs ne inoaukihoang ohroj ma kin ipwilki Ih.
13 Armaj men ma lelloang nehn jongjong pwa apwal ma lelloang ih en johpwa pwa, “Kajongjonngoauwe jang ipen Koahs.” Pwa johpwa me naunahkij kak kajongjongi Koahs, pel pein Koahs johkin kajongjongi armaj.
14 A Armaj kin lelloang nehn jongjong jang in pein ah inoang nauna; me ioar kin kainoangihoang pein ih apel kahrehng ih nehn dihp.
15 Doari, ih kin kanoaisikihda ah inoang nauna oaroh dihp ken koalikla, anjoauwo ma ih pwoaida ken kahrehda mehdi.
16 Rioai kan ma ngoah kin ipwilki, joah kapweipweiekdi!
17 Joangoan wihwia japan ohroj apel kijakij mwehu ohroj kin indihdohjang nehnloannge; irai kin indihdo jang ipen Koahs, Jounwioapoan maram kan ohroj nehnloannge, ma johkin wikla, pel johpwa mwomwen wiklahkij mine ipoa.
18 Pein ih ma lemehda pwa ih en wiahda kisai jang Ah Mahjan mehlel, pwa kisai en wiahla keiou nehn Nah kapikpik ohroj.
Rongrong apel Wihwia
19 Rioai kan ma ngoah kin ipwilki, kamwai samsaman mehkije: kamwai ohroj en nehn kapehd pispis oang rong, a en joah kin karwaro oang lallal apel lioasla,
20 pwa en armaj lioas johkin jeuweje kapwoaida lamlam pwung in Koahs.
21 Doari, kerpwihjang joangoan siahk jamin kan ohroj apel joangoan wihwia japwung kan ohroj. Oaloahda in aksiksik Ah Mahjan ma Ih ne poadokdihoang nehn mohngiongimwai kan, ioar ma kak kamourihla kamwai.
22 Kamwai kapwaihahda en Koahs Mahjan, pwa ma kamwai rongrongrongoar doari, kamwai pirin kapweipwei pein kamwai.
23 Pwa armaj men ma kin rongrongrongoar Mahjan in Koahs, a johkin kapwaihahda, ih doahroar armaj ma kin kapang doahr ih nehn kilahssoau;
24 a nehn ah kin sohlahjang kilahsso, anjoauwohr ih pel moalkoahla doahr mwomwe.
25 Armaj ma kin soahkmwehui kojonned unjekko, ma kin kajaldekihla armaj, ma ioar Rongmwehu in Christ, pel kin dadaurroar, johkin rongrongrongoar moalkoahla, a ih kin kapwaihahda — ioar armajmene ma Koahs pirin kapaiahda ih nehn dahkij ih kin wia.
26 Armaj men ma kin leme pwa ih joaroawi, a ih johkin powehdi loawoa doari, ah joarwiho joh kaspoa; ih kin kapweipwei pein ih.
27 Me ioar doahr poadidihoang papah Koahs ma uhdahn pwung apel unjek mehlel ma Jamasai Koahs kin pwungki: apwali jeri jopwoupwou kan apel liohdihkan nehn arai apwal kan apel johpwa jaminkihla siahk nauna kan in jampahioauwe.